Европын Сэргээн Босголт Хөгжлийн банкнаас хэрэгжүүлэх “Гэр хорооллын усан хангамжийг сайжруулах” төслийн хүрээнд  Эрдэнэт хотын инженерийн шугам сүлжээг шинээр барих, шинэчлэх ажлын жагсаалтыг өнөөдөр захирагчийн зөвлөлөөс танилцууллаа. Орхон аймаг, Эрдэнэт хотод нийт 14 сая долларын төсөл хэрэгжих бөгөөд үүний 3 сая доллар буюу ойролцоогоор 9 тэрбум төгрөгийн хөрөнгө оруулалтаар ИШС-г шинэчлэх сайжруулах ажил хийгдэх юм. Тус ажлын хүрээнд хаана, ямар байршилд инженерийн шугам сүлжээг сайжруулах, шинэчлэх шаардлагатай байгаа талаар танилцуулагдаж, санал солилцлоо. 

        Эхний ээлжинд 20 гаруй байршилд нийт 10 гаруй километр шугамыг шинэчлэх, сайжруулахаар санал гараад байна. Эдгээр нь  техникийн гэмтэлтэй болон насжилт нь гүйцсэн, элэгдэлд орсон шугам сүлжээнүүд юм. Тодруулбал: Баянцагаан багийн үйлдвэрийн районы цэвэр усны шугам нь анх 1978 онд ашиглалтанд орсон. Одоогийн байдлаар ашиглалтын хугацаа дууссан, аваар гэмтэл ихээр гардаг цаашид ашиглахад хүндрэлтэй болсон. 

 Мөн Говил багийн хонхорын УДТТ-ийн цэвэр усны шугам шинээр татах ажил нь 1978 онд ашиглалтанд орсон.  Одоогийн байдлаар дулаан, цэвэр усны шугам нь ашиглалтын хугацаа дуусч аваар, гэмтэл ихээр гарч усны алдагдал гарч байгаа тул цаашид ашиглахад хүндрэлтэй болсон. Даваат баг Манханы УТБ-57-ын цэвэр усны шугамыг шинээр татах, Шанд багийн УТБ18-ын хөлдсөн цэвэр усны шугамыг шинээр татах зэрэг саналууд танилцуулагдлаа. Тэдгээр шинэчлэх шаардлагатай бүх шугам хоолойнуудад МХГ-ын байцаагчийн дүгнэлт гаргуулах, ногоон байгууламж, иргэдийн эд хөрөнгө, зам талбай, хүүхдийн тоглоомын талбай зэрэг газруудад эвдрэл гэмтэл гарргахгүйгээр шийдвэрлэх тал дээр анхаарч тооцоо судалгаагаа гаргахыг Засаг дарга С.Батжаргал холбогдох албаныханд үүрэг болголоо. 

Мэдээллийн төв