Монгол улсын зүүн хязгаар Дорнод аймгийн танил маань залгаж байна. Амины яриа маань сүүлдээ албаных болж Эрдэнэт үйлдвэрийн талаар мэдээлэл авах тухай өргөжлөө. Хамгийн түрүүнд “Эрдэнэт үйлдвэр” ТӨҮГ-ын Маркетингийн хэлтсийн Олон нийттэй харилцах албаны “Etdenetmc.mn” хаягийг нь дуулгалаа. Мессежээр дахин баталгаажуулах юм болов. Эртний танилаасаа ямар учраас Эрдэнэт үйлдвэр, уурхайчдын талаар мэдээлэл цуглуулах болсныг нь сонирхтол өөдөөс “Хэрэглэгч бидний тог, цахилгаан, дулааны мөнгийг Засгийн шийдвэрээр бидний өмнөөс төлж байгаа энэ сайхан үйлдвэртэй танилцаж болдог болов уу. Цэргийн маань он жав тэр үйлдвэрт ажилладаг тухай дуулдсан. Чи сургийг нь гаргаж өгнө дөө” гээд авч байна. “Ингэхэд танай аймагт тог, цахилгаан дулааны мөнгөө Эрдэнэт үйлдвэрээр төлүүлж байгаа хэдэн иргэн, аж ахуйн нэгж байдаг юм бэ” гээд л өмнөөс нь асуутал. Чамд найз нь тэмдэглэлийн дэвтрээ харж байгаад баараггүй хэдэн тоо өгнө. Чи харин сайн тэмдэглэж авна шүү. Бид чинь Монголын хамгийн том зэсийн баяжуулах үйлдвэрийн буяныг алс хол Дорнын хязгаарт амьдардаг ч гэсэн хүртэж байгаа хүмүүс. Үнэн юм чинь. Уурхайчид ч мундаг хүмүүс л дээ хэмээсэн. Миний эртний танилын өгсөн тоон мэдээллээс уншигчтайгаа хуваалцаж байна. Дорнод аймгийн хэмжээнд цахилгаан эрчим хүч хэрэглэдэг нийт 21361 хэрэглэгчтэй ажээ. Үүнээс аймгийн төвийн гэр хороололд нь 10252 айл өрх байдаг гэнэ. Харин орон сууцанд 5062 амьдардаг юм байна. Дорнод аймгийн хэмжээнд 1152 аж ахуйн нэгж байдгийн 13 нь уул уурхайн салбарынх. Хөдөө 13 сумтай, сумаас 30-90 км алслагдсан 3 баг, хилийн 3 боомтод нийт хэрэглэгч буюу 4128 айл өрх, 754 аж ахуйн нэгж байдаг агаад бүгд л Эрдэнэт үйлдвэр, эрдэнэтийн уурхайчдын буянаар, Засгийн газрын шийдвэрээр тог, цахилгааныхаа мөнгийг хөнгөлүүлж байгаа ажээ. Бас болоогүй ээ, Дорнод аймгийн хэмжээнд Дулааны эрчим хүч хэрэглэдэг 6939 хэрэглэгчтэй юм байна. Үүнээс, 6117 нь айл өрх байдаг бол 822 аж ахуйн нэгж нэгдсэн дулаан хангамжид холбогджээ. Ингэхлээр Дорнод аймгийн хамгийн захын сум Халх гол сумын иргэн Бат ч гэсэн цар тахлын хүнд хэцүү цаг үед Эрдэнэт үйлдвэрийн уурхайчдын бүтээсэн баялагаас, үр шимээс нь хүртэж байна. Эрдэнэт уулын буяныг монголчууд нийтээрээ хүртэж байгаагийн нэгэн жишээ энэ буюу.