Улс тунхагласны баяр буюу арваннэгдүгээр сарын 26-ны хууль ёсны амралтаа бөхөө үзээд амарт байтал утас дуугарлаа.  Бараг л мэндийн зөрөө ч үгүй шахам “ Дархлаажуулалтын IV тун хийгээд эхэлчихэж. Хаана хийж байгааг нь чи мэдэх үү. Би хийлгэмээр байна. Юмыг яаж мэдэхэв гадаад улс орон хилээ нээгээд вакцинд хамрагдсан иргэдийг нэвтрүүлнэ гэвэл би IV тундаа хамрагдчихвал ногоон гэрлээр л гарна. БОЭТ юм уу, хаана  хийгээд байгаа юм бэ” гээд л чихэн дээр хашхирч байна. Нөхрийн дуржигнатал ярьсан яриа энэ тэр нөлөөлсөн үү “нэрээ би чинь гуравдугаар тунгаа хэзээ хийлгэлээ. Юу билээ” ч гэж бодогдоход хүрсэн юм.

Эрдэнэтийн уурхайчид “Дөрөвдүгээр тун нь дасгал хөдөлгөөн, соёл урлаг, эрүүл зөв хоололт, эмчийн зөвлөгөө, инээмсэглэл хайр юм...” уриан дор   “Дархлаажуулалтын 4-р тун” аяныг эхлүүлчихсэн уурхайчдынхаа дунд  нөлөөллийн ажил хийгээд эхэлчихсэн тухай мэдээг миний нөхөр дутуу дулимаг ойлгоод мунгинаж явжээ. Үйлдвэрийн албан ёсны мэдээллээс харвал 2021 оны арваннэгдүгээр сарын 26-ны байдлаар аль хэдийнээ 98 хувьтай хамрагдаж дараагийнхаа вакцин юу байж болох тухай ярилцаж байна. Эрдэнэт үйлдвэрийн Ерөнхий захирлын Хамтын ажиллагаа, нийгмийн асуудал хариуцсан орлогч Ц.Бат-Энх үйлдвэрийн газрынхаа  онцлог, давуу талд тулгуурлан, ажилчдынхаа дархлааг хамгаалах, сэргээх зорилгоор “Дархлаажуулалтын 4-р тун” аяныг эхлүүлсэн нь цаг үеэ олсон, цар тахлын үеийн уур амьсгалыг зөөллөсөн, хүн бүрийн сэтгэлд хүрсэн “сэргээш” болон дэлгэрчээ. Энэхүү аяныг Нийгмийн харилцааны хэлтэс, түүний харьяа цехүүд, Маркетингийн хэлтсийн Олон нийттэй харилцах албаны хүчээр өрнүүлсэн нь даруй 7 мянга гаруй  уурхайчныг бүрэн хамарчээ.

 “Дархлаажуулалтын 4 дүгээр тун” аян долоо хоног бүр өөр өөр өнгө аяс, хэмнэлээр баяжигдан үргэлжлэх аж. Спорт цогцолборын хамт олон аяныг “Дархлаажуулалтын 4-р тун нь дасгал хөдөлгөөн юм” уриан дор эхлүүлсэн нь нийт ажилчдыг ажлын байрны хөгжимт дасгалд уриалж бага үдийн 10.10, 15.10 цагт тогтмолжин, үйлдвэрийн соёлын хэмжээнд хүртлээ хэвшлээ. Хамгийн сонирхолтой нь олныг хамарсан тайлангийн хурал хийж байсан ч цаг нь болоход түр завсарлан дасгалдаа нэгддэг болсон нь том үр дүн, хөгжил тухай үйлдвэрийнхэн маань бахархан бичиж байна. Дээр нь ажилчдын нэгдсэн алхалтыг баасан гараг бүр “Эрүүл мэндийн зам” дээрээ зохион байгуулдаг болж. Энэ бүхэн миний найзын хайгаад байсан “Дархлаажуулалтын IV тун”  байсан ажээ. Үйлдвэрийнхэний энэхүү “Дархлаажуулалтын  IV тун”-г аймгийн хэмжээнд өрнөж байгаа “Соёлыг түгээе” аянтай холбочихвол ч эрдэнэтчүүдээс “Ковид 19” абугай өөрөө дайжчих ч юм билүү гэж бодогдоход хүрлээ. Эрдэнэтийн уурхайчид гэлтгүй хотын иргэд “Дархлаажуулалтын IV тун” аяныг уухайлан дэмжихэд буруу юу байхав.