“Эрдэнэт хотын өдөр”, “Анхдагч илгээлтийн эздийн өдөр”-ийг тохиолдуулан төрийн байгууллагын албан хаагчид Нутгийн удирдлагын ордонд Төрийн жинхэнэ албан хаагчийн тангараг өргөв.

Аймгийн хэмжээнд төрийн захиргааны болон төрийн үйлчилгээний 92 байгууллага, орон нутгийн өмчит 11 байгууллага, төрийн тусгай чиг үүргийн 9 байгууллагад нийт 6173 албан хаагч ажиллаж байгаа бөгөөд төрийн захиргааны болон төрийн үйлчилгээний 92 байгууллагад 4241 төрийн албан хаагч төрийн чиг үүргийг хүргэдэг.

“Эрдэнэт хотын өдөр”-өөр  төрийн захиргааны 4 байгууллагын 24 албан хаагч "Төрийн жинхэнэ албан хаагчийн тангараг" өргөсөн юм.

Төрийн албаны тухай хуулийн 12 дугаар зүйлийн 12.1 дэх хэсэг, Монгол Улсын Ерөнхийлөгчийн 1995 оны 109 дүгээр зарлигаар баталсан “Төрийн захиргааны албан хаагчийн тангараг өргөх ёслолын журам”-ыг үндэслэн Төрийн албаны мэргэшлийн шалгалт өгч, тэнцсэн иргэд тангараг өргөж төрийн албанаа жинхэлдэг ажээ.

Төрийн албан хаагчийн тангараг өргөх ёслолд УИх-ын гишүүн Д.Батлут, аймгийн ИТх-ны дарга Д.Мөнхбат, аймгийн Засаг дарга С.Батжаргал, аймгийн Засаг даргын орлогч А.Түвшинжаргал, аймгийн ЗДТГ-ын дарга, Орхон аймгийн Төрийн албаны салбар зөвлөлийн дарга Д.Соёлчхүү, албаны бусад хүн оролцов.