Эрдэнэтчүүд бид 5 дахь удаагаа “Эрдэнэт хотын өдөр”-ийг хоёр хоногийн дараа тэмдэглэх гэж байна. Тэртээ 1975 оны 12 дугаар сарын 11-нд БНМАУ-ын Ардын Их Хурлын Тэргүүлэгчдийн зарлигаар Булган аймгийн Эрдэнэт хороог Эрдэнэт хот болгох тухай шийдвэр гарч байжээ.

Ардын Их хурлын Тэргүүлэгчдийн зарлиг гарсан тэрхүү өдрийг “Эрдэнэт хотын өдөр” болгон тэмдэглэж байхаар аймгийн ИТХ-ын 2017 оны ээлжит VIII хуралдаанаас шийдвэрлэсэн байдаг.  

Энэ жилийн хувьд “Эрдэнэт хотын өдөр” ихээхэн өвөрмөц онцлогтой, утга агуулгатайгаар тохиож байна. Аймаг, орон нутгийн байгууллагын шийдвэрээр ирэх арванхоёрдугаар сарын 11-нийг “Эрдэнэт хот болон Анхдагч, илгээлтийн эзэдийн өдөр” хэмээн өргөн хүрээнд тэмдэглэхээр болсон. Зууны манлай бүтээн байгуулалт болсон Эрдэнэт хотыг тэртээ 1976 онд эвлэлийн илгээлтээр ирсэн илгээлтийн эзэд, анхдагчид бүтээн босгосныг  Эрдэнэт хотын түүх, Монголын түүх илтгэдэг. Анхдагч, илгээлтийн эздийнхээ түүхэн гавьяаг мөнхжүүлэх, Орхон аймгийн түүхт 45 жилийн ойн хүрээнд ийнхүү өргөн дэлгэр хэлбэрээр тэмдэглэж байгаа.

“Эрдэнэт хот болон Анхдагч, илгээлтийн эзэдийн өдөр”-ийг зохион байгуулах комиссоос арга хэмжээний хөтөлбөрийг олон нийтэд гаргажээ. Маргааш буюу арванхоёрдугаар сарын 10-нд Үндэсний бөхийн барилдаан, Өрхийн эрүүл мэндийн төвүүдийн нээлт зэрэг олон арга хэмжээ болно.

12-р сарын 10-ны өдөр 

09:30 - Төрийн жинхэнэ албан хаагчийн тангараг өргөх ёслол /Нутгийн удирдлагын ордны Хурлын танхимд/

08:00, 13:00  – Ерөнхий боловсролын сургуулиудын сурагчдад “Эрдэнэтийн алдартнууд” сэдвээр хичээл заах /аймгийн ИТХ-ын төлөөлөгчид оролцоно./  

11:30 -  Баян-Өндөр сумын “Энхжихмандариваа” өрхийн эрүүл мэндийн төвийн барилгын нээлт /Их залуу багт/      

12:30  – Баян-Өндөр сумын “Нийцэл” өрхийн эрүүл мэндийн төвийн барилгын нээлт  /Булаг багт/ 

13:30 – Баян-Өндөр сумын “Баянцагаан багийн төрийн үйлчилгээний цогцолбор байр”-ны нээлт  /Баянцагаан багт/ 

10:00 - 13:00   - Соёлын яамны ажлын хэсгийн цуврал сургалт, “Соёлыг түгээе” аяны хаалтын үйл ажиллагаа / Хүүхэд залуучуудын театрт /

16:00  - Үндэсний бөхийн барилдаан /Биеийн тамир спортын газрын “Б” зааланд

16:00  - Урчуудын эвлэлийн харьяа Орхон аймгийн Зураач, урчуудын холбооны Уран бүтээлийн үзэсгэлэнгийн нээлт /Хүүхэд залуучуудын театрт/

18:00-20:30 цагт  - Монгол Улсын Ерөнхийлөгчийн зөвлөх Д.Бум-Очирын “Аялгуут лекц” арга хэмжээ /Уурхайчин соёлын ордны Их танхимд/ болно.