Аймгийн Засаг даргын Тамгын газрын захиалгаар Нийгмийн эрүүл мэндийн үндэсний төвийн хийж буй “Эрдэнэт үйлдвэрийн хаягдлын сангийн цагаан тоосны хүний эрүүл мэндэд үзүүлэх нөлөөллийн үнэлгээ” сэдэвт судалгааны ажлын явцын тайланг танилцууллаа. Тайлангийн хуралд Аймгийн Засаг даргын нийгмийн асуудал эрхэлсэн орлогч А.Түвшинжаргал болон холбогдох албаны хүмүүс оролцлоо.

Дээрх ажил нь  “Цагаан тоос” дэд хөтөлбөрийн хүрээнд хийгдэж буй судалгаа бөгөөд “Эрдэнэт Үйлдвэр” ТӨҮГ-ын үйлдвэрлэлийн технологийн хаягдал цагаан тоос нь Эрдэнэт хотын иргэдийн эрүүл мэнд болоод агаар хөрсөнд хэрхэн нөлөөлж байгаа талаар үндсэн хоёр судалгаа хийгдэх юм. Ингэхдээ цагаан тоосны дэгдэлт хүн амын эрүүл мэндэд нөлөөлж буй эсэхийг эрүүл мэндийн статистик үзүүлэлтээр судална. Түүнчлэн нөлөөллийн болон дам бүс нутагт амьдарч буй иргэдийг эрүүл мэндийн үзлэг шинжилгээнд хамруулах, био мониторингийн аргачлалаар нарийн ширхэгт тоосонцорт хүний биед нөлөөлөх химийн элементүүд байгаа эсэхийг судлах ажлууд хийгдэх ажээ.

        Ажлыг 2021 оны арванхоёрдугаар сард хүлээлгэн өгөхөөр гэрээнд заасан боловч цар тахлын улмаас ажил удааширч судалгаа хийх боломжгүй байсан тул гэрээний хугацааг сунгах саналыг Нийгмийн эрүүл мэндийн үндэсний төвийн судлаачдын зүгээс гаргалаа.