Аймгийн Засаг даргын шуурхай зөвлөгөөн болов.  Шуурхайг Засаг дарга С.Батжаргал удирдан явууллаа. Энэ үеэр аймгийн Засаг даргын орлогч М.Түмэнжаргал холбогдох албадын дарга нарт үүрэг өглөө. Тэрбээр “Сэлэнгэ голын сав газрын захиргааг Говилийн багийн нэгдсэн байр луу үтэр түргэн нүүлгэ. Хорооллын эцэст байдаг Багийн нэгдсэн байранд багталцахгүй байна. Дээр нь Хүнс, хөдөө аж ахуйн газрыг Баянцагааны багийн нэгдсэн байр луу нүүлгэх ажлыг яаралтай зохион байгуулах хэрэгтэй” хэмээсэн юм.

Босоо удирдлагатай, төрийн чиг үүргийг орон нутагт хэрэгжүүлдэг Сэлэнгэ голын сав газрын захиргаа гэх мэт зарим байгууллагыг зорьж очиж үйлчилгээ авдаг Эрдэнэт хотын иргэн гэж үнэндээ бараг л байхгүй. Энэ байгууллагын үндсэн чиг үүрэг, энэ тэр нь ч иргэдэд нээлттэй ил тод биш. Дарга даамлууд нь хаана төрөөс хөнгөлөлттэй зээл, мөнгө олгож байна тэнд л давхиж явдаг болохоос өөр хийж байгаа ажил нь бүрхэг нэгэн байгууллага Багийн нэгдсэн байранд ширээ сандал тавьчихаад занхайж байгааг иргэд  ойлгохгүй байгаа. Харин ч Говилын багийн байранд оруулчихвал цаашаа Ингэт рүү, Сэлэнгэ гол руу улам ойртох гарцыг зөв гэж харж байна. Зарим үед босоо удирдлагатай байгууллагууд хувийн хэвшлийн байранд өндөр үнэтэй түрээс төлөөд татвар төлөгчдийн мөнгийг улайх ч үгүй цацдаг, үрдэг байдал манай аймагт ч байсан.

Ирэх долоо  хоногийн шуурхайд М.Түмэнжаргал даргын өгсөн үүрэг даалгавар хэрхэн биелэгдсэнийг эрдэнэтчүүд харах л үлдлээ.