Эрдэнэтчүүдийн хэзээний танил гэрэл зурагчин, хэвлэлийнхэн бидний авгайлдаг “Том ах” буюу Өлзийн Лхагвахорлын  “Түүхэнд мөнхөрсөн он жилүүд” гэрэл зургийн цомгийн нээлт болов. Завхан аймгийн Тосонцэнгэл сумын уугуул манай “Том ах” 1979 онд Эрдэнэт хотод ирсэн цагаасаа, улмаар тухайн үеийн Эрдэнэт хотын төр, захиргааны төв хэвлэл “Эрдэнэт сонин”-ы гэрэл зургийн сурвалжлагч болсон цагаасаа хотынхоо дүр төрхийг фото хальснаа буулгасан байдаг.  

Түүний “Түүхэнд мөнхөрсөн он жилүүд” гэрэл зургийн цомог 400 шахам хуудастай, 210х280 хэмжээтэй, 47 хэвлэлийн хуудас. 1979 оноос хойш өнөөдрийг хүртэлх 1600 гаруй ховор нандин, түүхэн зургийг багтаажээ. Номын нээлтэд аймгийн ИТХ-ын дарга Д.Мөнхбат, аймгийн Засаг дарга С.Батжаргал болон Эрдэнэтийн ахмад, дунд үеийн гэрэл зурагчид, “Эрдэнэт сонин”-ы төлөөлөл хэвлэл мэдээллийнхэн, гэрэл зурагчин Ө.Лхагвахорлын ах дүүс оролцлоо.

Тэрбээр “Энэ жил Эрдэнэт хотын түүхт 45 жилийн ой тохиож байгаа. Энэ номонд Эрдэнэт хотын 42 жилийн үүх түүх багтсан. Олон зуун мянган гэрэл зургуудаас шилж сонгож гэрэл зургийн цомогт багтаана гэдэг амаргүй ажил юм байна. Гэхдээ ямар ч байсан өнөөдөр номынхоо нээлтийг хийж байна” гэлээ. Эрдэнэт хотын нэрийн хуудас болсон энэхүү бүтээл нь Орхон аймгаар айлчлан өнгөрсөн хэн бүхэнд дурсгалтай бэлэг дурсгал, Эрдэнэт хотын 45 жилийн түүхийн архив болох нь дамжиггүй.