Аймгийн ИТХ-ын V  хуралдаан хуралдав. Энэ удаагийн хуралдаанаар

1. Аймгийн ИТХ-ын Тэргүүлэгчдийн бүрэлдэхүүнд өөрчлөлт оруулах тухай
2. Аймгийн хэмжээнд 2022 онд иргэдэд гэр бүлийн хэрэгцээний зориулалтаар үнэгүй өмчлүүлэх газрын байршил, хэмжээг тогтоох тухай гэсэн хоёр асуудлыг хэлэлцсэн юм.

2020 оны аравдугаар сарын 28-нд аймгийн ИТХ-ын найм дахь удаагийн бүрэн эрхийн анхдугаар хуралдаанаар Тэргүүлэгчдийг 11 хүний бүрэлдэхүүнтэй байхаар тогтсон. Улмаар тэргүүлэгчдэд МАН-аас 9, АН-аас 2 хүн байхаар олонхийн бүлгээс санал оруулсан. Харин АН-ын зүгээс Тэргүүлэгчдэд 3-4 хүнээ оруулах ёстой, бид орон нутгийн сонгуулиар сонгогчдын 50 шахам хувийн санал авсан, 12 хүнтэй бүлэг энэ байр суурин дээрээ бат зогсоно хэмээн мэдэгдсэн. Харин олонхийн зүгээс 2 хүнийг л Тэргүүлэгчээр оруулах боломжтой гэсэн хатуу байр суурь баримталснаас үүдэн сөрөг хүчний төлөөлөл аймгийн ИТХ-ын Тэргүүлэгчдэд орж амжаагүй. Асуудал шүүхээр жил гаруй хугацаанд үргэлжилж, сунжирсаар хамгийн сүүлд  аймгийн ИТХ дахь АН,  МАН-ын бүлгүүд “Эвлэрэлийн гэрээ” байгуулж асуудлыг шийдсэн.

“Эвлэрэлийн гэрээ”-гээр аймгийн ИТХ-ын 11 тэргүүлэгчийн 3-д нь АН-ын төлөөллийг оруулахаар болсон. Ингээд өнөөдрийн ээлжит V хуралдаанаар аймгийн ИТХ-ын тэргүүлэгчдэд АН-аас Бүлгийн ахлагч Д.Өсөхбаяр, аймгийн АН-ын дарга Ц.Батхуяг, төлөөлөгч Д.Ганболд нарын нэрийг дэвшүүлсэн. Хурлын дэг жаягийн дагуу нууц санал хураалт явуулахад гурван нэр дэвшигч олонхийн санал авснаар өнөөдрөөс эхлэн аймгийн ИТХ-ын Тэргүүлэгчээр сонгогдлоо.