Аймгийн ИТХ-ын Тэргүүлэгчдийн хуралдаан лхагва гарагт болсон. Хуралдаанаар 8 асуудал авч хэлэлцсэн юм. Эдгээрийн нэг нь Хот байгуулалт, барилга, захиалагчийн алба Орон нутгийн өмчит, аж ахуйн тооцоот үйлдвэрийн газар /ОНӨААТҮГ/-ын дүрмэнд өөрчлөлт оруулах асуудал байв.

Монгол улсын зарим хууль, Засгийн газрын тогтоолд өөрчлөлт орсонтой уялдуулан тус газрын дүрмэнд өөрчлөлт оруулж байгаа аж. Мөн Орхон аймагт хэрэгжих “Дахин төлөвлөлтийн ажил”-ыг мэргэжлийн байгууллагын хувьд Хот байгуулалт, барилга захиалагчийн алба хариуцах болсон зэргээс үүдэн Дүрмэнд нь өөрчлөлт оруулах зайлшгүй шаардлага урган гарчээ. Ийнхүү аймгийн ИТХ-ын Тэргүүлэгчдийн хувьд Дүрмэнд өөрчлөлт оруулах асуудлыг дэмжсэнээр Эрдэнэт хотод ирэх жилээс эхлэн өрнөх Дахин төлөвлөлтийн ажил нэг шат ахих юм байна. Тус байгууллагын дүрмэнд “...хот суурин газрын барилгажсан хэсэг, нийтийн эдэлбэр газрыг дахин төлөвлөх, ашиглалтын шаардлага хангахгүй байгууламжийг буулган шинээр барих, гэр хорооллын газрыг дахин зохион байгуулах, дахин төлөвлөн барилгажуулах, орон сууцны хангамжийг нэмэгдүүлэх, иргэдийн амьдрах орчныг дээшлүүлэх чиг үүргийг нэмж тусган, бусад өөрчлөлтүүдийг оруулах” зэрэг зүйл заалт нэмэгджээ.