Даваа гарагийн  /10 сарын 18/ аймгийн Засаг даргын шуурхай зөвлөгөөнд Хот  байгуулалт, барилга захиалагчийн албаны дарга Ц.Баяжаргал нэгэн үүрэг даалгаврын биелэлтийг ирүүлсэн. “Эрдэнэт консрактив” ХХК-ийн 7А хороолол буюу Их хаадын цуваа хотхоны байрнуудын өмнүүр ухсан инженерийн шугам сүлжээний ажлын тухай. Ц.Баяржаргал даргын ирүүлсэн үүрэг даалгаврын биелэлтэд “Гүйцэтгэгч Эрдэнэт констрактив болон Байгаль орчны 56 айлын орон сууцны барилгын гадна шугам сүлжээний ажлын туршилт тохируулгыг 2021 оны аравдугаар сарын 14-ний өдөр хийж шалгасан. 2021 оны аравдугаар сарын 18-ны өдрөөс хучилтын ажил эхэлнэ. Авто зам болон гэрэлтүүлгийн ажлыг СӨХ болон ХЗА-тай гэрээ байгуулсаны үндсэн дээр гүйцэтгэж байна” гэх хариу ирүүлжээ.

Ц.Баяржаргал дарга 7А хорооллын 5, 7 дугаар байрны орчимд өөрийн биеэр ирж үзээгүй байж аймгийн Засаг даргаа хуурч, үүрэг даалгаврын биелэлтийг хуурамчаар гарган өгч мэхэлсэн байх аж. Юун шугам сүлжээний ажлын туршилт тохируулга хийсэн гэж. Төмөр хоолойнуудаа ч хооронд нь нийлүүлж гагнаагүй байгаа зураг нь энэ байна.  Үүний хаагуур, ямар туршилт хийчихэв ээ, Баяржаргал дарга аа. Овоолсон шороогоороо нүхээ булах ажил чинь хаана байна аа.

Өнөөдөр аравдугаар сарын 22. 7А хорооллын 5, 7 дугаар байрны оршин суугчид, энэ байранд авто зогсоол эзэмшигч 20 шахам иргэн наймдугаар сарын 16-наас хойш дулаан гараашдаа машинаа хийж чадахгүй хэвээр л байна. Уг нь дээрх 20 шахам иргэн Монгол улсад мөрдөгдөж буй хууль тогтоомжийн дагуу дулаан гарааш авто зогсоолыг худалдаж авсан. Гэтэл өнөөдөр худалдаж авсан гараашдаа машинаа ч тавих боломжгүй 66 хонож байхад Ц.Баяржаргал тэргүүтэй төрийн албанд суудлын бөглөөс болсон, ажлаа мэддэггүй, ажил хийх бодолгүй, Эрдэнэт сэтгэлгүй, нам дагасан хурган дарга нар иргэдийг хохироож дээр нь төрийн хууран мэхэлж  байна. Өнөөдөр бодит байдал дээр ухаад хаячихсан овоолсон шорооны улмаас  7А хороололд орой 20.00 цагаас хойш автомашин байрлуулах гадна зогсоол олддоггүй, иргэд зутруухан намаржиж байгааг дарга нар мэдсэн хэрнээ гудийх ч үгүй хэнэггүй царайлаад явна. Харин ч аймгийн Засаг даргын шуурхай дээр “Асуудлыг шийдчихсэн. Одоо булах ажил хийх гэж байна” хэмээн хэнэг ч үгүй худлаа залж нүглийн нүдийг гурилаар хуурч сууна.

С.Жаргалсайхан даргатай Байгаль орчин, аялал жуулчлалын газрынхан барилгын компанийнхантай хувь, хувьсгалын мөнгөө нийлүүлж байгаад байшин барихаар өнгөрсөн жил ажил өрнүүлсэн. Тэрхүү байшинд инженерийн дэд бүтэц татахын тулд татвар төлөгчдийн мөнгөнөөс их хэмжээний хөрөнгө гаргаж дээрх ажлыг хийж байгаа. Монгол улсын Ерөнхий сайд Л.Оюун-Эрдэнэ Орхон аймагт ажиллах үеэрээ “Төрийн байгууллага байшин барихыг зөвшөөрөхгүй. Хувийн хэвшлийнхэний хийх ажилд төр зэрэгцээд орж болохгүй” гэж байр сууриа илэрхийлсэн. Манай аймаг, орны удирдлага хувийн хэвшлийнхэнтэй нийлээд бизнес хийж байгаагийн нэг жишээ нь Байгаль орчин, аялал жуулчлалын газрын барихаар төлөвлөж байгаа 56 айлын орон сууц. Газар нь төрийнх буюу Байгаль орчин, аялал жуулчлалын газрын нэр дээр байдаг. Байшинг нь хувийн хэвшлийн барилгын компани барьж байгаа. Эндээс харвал С.Жаргалсайхан дарга бизнес хийгээд байгаа юм уу эсвэл төр барилга бариад иргэдэд өндөр үнээр зарах гээд байгаа юм уу.

Үүнээс болоод 7А хорооллын иргэд машин тавих  зогсоолгүй, гэртээ орох гэж байлдааны нуувчин дундуур явж байгаа мэт байдалтай өдөр хоногийг өнгөрөөж байхад төр ажлаа мэдэхгүй, анзаарахгүй байгааг “Энэ төрийн эмгэнэл” гэхээс өөр яалтай.

Хамгийн сонирхолтой нь “Эрдэнэт констрактив” ХХК-ийн 186 сая төгрөгийн төсөвт өртөгтэй ажилд Хот байгуулалт, барилга захиалагчийн албаны хяналтын инженер н.Хүрэлсүх гэгч хяналт тавьж байгаа гэх боловч энэ хүн утсаа авдаггүй, ажлын байран дээрээ байдаггүй, нэг л их гадуур ажилтай төрийн албан хаагч даргадаа худал мэдээлэл өгөөд таваргаж явна.  Албан бус мэдээлээс харвал “Эрдэнэт констрактив” хөрөнгө мөнгөний боломжгүй учраас ажлаа хийж чадахгүй байгаа. Улмаар үүнийг хийж дуусгахын тулд төр 186 сая төгрөгийг нь бүтнээр нь өгвөл сая хийж болох тухай яриа дуулдаж байна. Төрийн арчаагүй, сул дорой байдлаас шалтгаалж иргэд хохирч байгааг аймаг, орон нутгийн удирдлага мэддэг болов уу. Ядаж газар дээр нь ирж ганц ч удаа болов ажиллаж үзээсэй. Байгаа байдал нь нэг иймэрхүү л байна.