Аймгийн ИТХ-ын Тэргүүлэгчдийн асуудал шүүхийн шатанд хянагдаж бүр адаг сүүлдээ маргаан нь эцэс төгсгөлгүй мэт үргэлжлэн, аймаг орон нутгийн асуудалд ч сөргөөр нөлөөлж эхэлсэн. Есдүгээр сард хуралдсан аймгийн ИТХ-ын хуралдаан дээр хурлын дарга Д. Мөнхбат “Сөрөг хүчин буюу АН-ын нөхдийг тэргүүлэгчдийн асуудал дээр ярилцъя, зөвшилцөх саналтай байна гэхэд орж ирдэггүй. Тэгсэн атлаа энэ асуудлаа улстөржүүлдгээ болих хэрэгтэй. Аймаг орон нутгийн төлөө гэсэн чинь сэтгэлтэй юм бол суугаад ярилцая л даа” хэмээн хатуухан мэдэгдэж байсан. Аравдугаар сарын эхээр болох шүүх хуралд хариуцагч ИТХ-ын дарга Д.Мөнхбат, гуравдагч этгээдийн итгэмжлэгдсэн төлөөлөгч, аймгийн Засаг даргын орлогч А.Түвшинжаргал нар тодорхой шалтгаангүйгээр шүүх хуралд ирээгүй тул хуралдаан хойшилсон тухай дуулдаж байсан. Дараагийн хурал болох гэтэл “шүүгч нар Ковидын халдвар туссан гэнэ” гэдэг шалтгаанаар мөн л хойшилсон. Тэгвэл саяхан заргалдан маргалдагч талууд шүүх дээр “Эвлэрэлийн гэрээ” байгуулсан  ажээ. Ингэснээр аймгийн ИТХ-ын дарга Д.Мөнхбат хариуцагчийн хувьд асуудлыг эв зүйгээр шийдэхээр болж АН-ын бүлэгтэй тохиролцсон байна. Аймгийн ИТХ нь 11 тэргүүлэгчтэй. Түүний 3 суудлыг АН-д өгөхөөр болжээ. Ингэснээр аймгийн ИТХ дахь АН-ын бүлгийн хувьд тэргүүлэгчдийн хуралдаанд 3 төлөөлөгчөө оруулах болсноор олонхийн гаргаж байгаа шийдвэрт хяналт тавих, мэдээлэл авах боломж нь илүү нээлттэй болох аж.

Харин Д. Мөнхбат даргын хувьд өмнөх 11 тэргүүлэгчийнхээ хэн хэн 3-ыг нь сул төлөөлөгч болгож буйгаа зарлах нь өнөө маргаашийн хэрэг болсон дуулдана. Нөгөө талаасаа аймгийн ИТХ-ын Тэргүүлэгч болох гэж тэмүүлдэг эрх баригчдын хувьд ч хяналтаа тавих, сөрөг хүчний үүргээ гүйцэтгэхэд Тэргүүлэгч болох нь чухал гэж тооцдог АН-ын бүлгийн хувьд “Эвлэрэлийн гэрээ” байгуулсан ч дахиад л асуудал үүсч  мэдэхээр байгаа. Энэ нь Засаг захиргаа, нутаг дэвсгэрийн нэгж, түүний удирдлагын тухай хуульд УИХ нэмэлт өөрчлөлт оруулж 2022 оны нэгдүгээр сарын 1-нээс дагаж мөрдөнө. Уг хуульд зааснаар бол ирэх сарын 1-нээс аймаг, сумын ИТХ дэргэдээ Тэргүүлэгчтэй байх боломжгүй болсон. Харин даргын дэргэд 5-7 хүний бүрэлдэхүүн бүхий Зөвлөл байх тухай хуульчилсан. Он гарангуут Зөвлөлд эрх баригчид хэдэн квоттой байх сөрөг хүчин болох АН-аас хэдэн хүн багтаах асуудалд “танай, манай”  дээрээ тулахгүй бол ямар ч байсан эхний ээлжинд талууд “Эвлэрэлийн гэрээ” байгуулсан ажээ.