Аймгийн Засаг даргын 2021 оны есдүгээр сарын 20-ны өдрийн А/460 дугаар захирамжаар Орхон аймгийн нутаг дэвсгэрт улсын болон орон нутгийн хөрөнгө оруулалт, төсөл хөтөлбөр, хувийн хөрөнгө оруулалтаар баригдаж байгаа барилга, инженерийн шугам сүлжээ, эрчим хүч, замын байгууламжийн ажлын гүйцэтгэлийн явц, чанарт хамтарсан хяналтыг хэрэгжүүлэх ажлыг хэсгийг байгуулсан билээ.

            Тус ажлын хэсгийг Орхон аймгийн Засаг даргын Хот байгуулалт, дэд бүтцийн асуудал хариуцсан орлогч М.Түмэнжаргал ахалж, гишүүдэд Хотын захирагчийн албаны дарга С.Ганцогт, аймгийн ЗДТГ-ын ХОХБТХ-ын дарга С.Даваадорж, дэд бүтцийн асуудал хариуцсан мэргэжилтэн Т.Ариунболд болон Газрын харилцаа барилга хот байгуулалтын газар, ХББЗА, “Эрдэнэт ус” ДТС ОНӨХК, Мэргэжлийн хяналтын газрын улсын байцаагч нарыг оролцуулсан билээ. 

            Дээрхий захирамжийн дагуу хяналт шалгалтын удирдамж боловсруулагдан хяналт шалгалтын ажил хийгдэж байна.

            Үүний дагуу өнөөдөр барилгын ажилд хяналт шалгалт хийсэн талаараа Орхон аймгийн Мэргэжлийн хяналтын газраас Засаг дарга С.Батжаргалд танилцуулга хийлээ.

            Хяналт шалгалтаар барилгын ажил гүйцэтгэж байгаа компани, ААН-үүд үнэ хямд, чанаргүй материал ашигладаг, барилгын өрөгт хийцийн бэхэлгээ, арматурчлалыг батлагдсан зургийн дагуу хийдэггүй, суурийн эргэн тойронд болон шалны доорхи хөрсөнд нягтаршуулалтыг хангалтгүй хийдэг, ХАБЭА-н норм, дүрэм журам зөрчдөг зэрэг зөрчил илэрсэн байна. Тухайлбал, "Тавин лан" ХХК-д Хөдөлмөрийн аюулгүй байдлын 11 төрлийн зөрчил илэрсэн байна.

         Цаашид зургийн даалгавар боловсруулахаас эхлэн хяналтын ажлыг сайжруулах, захиалагч инженерийн хяналтыг сайжруулах, хамтарсан хяналт шалгалтыг зохион байгуулж байх, мэдлэг чадвартай инженерүүдийг тогтвор суурьшилтай ажиллуулахад анхаарах зэрэг асуудлыг ярилцлаа.