Эрдэнэтчүүд гэлтгүй монголчууд яг энэ мөчид Энхбаярын Содномпилжээгээр “амьсгалж” байна. Э.Содномпилжээ “Токио 2021” паралимпын тэнгэрт эх орныхоо алтан соёмбот тугаа мандуулж, төрийн дууллаа эгшиглүүллээ. 

Монгол хүн бүр тэр мөчид омогшиж, эх орны хүүгээрээ бахархсан. Спортын түүхийн хуудаснаас харвал Монгол улсын тамирчид хүн төрөлхтөний их цэнгэл наадам болох  1964 оны Токиогийн зуны олимпын наадамд анх удаагаа оролцож байсан тэр цагаас хойш эдүгээ 57 жил өнгөрчээ. Тэгвэл 57 жилийн дараа Токиогийн тэнгэрт Монголын төрийн далбааг мандуулж, төрийн дуулал эгшиглүүлсэн тамирчин бол Эрдэнэт хотын унаган хүү Энхбаярын Содномпилжээ байлаа.

Тэрбээр энэ удаагийн паралимпын наадамд пауэрлифтингийн -107 кг-ын жинд 245 кг өргөж олимпын аварга болсон юм. Энэ өргөлтөөрөө өөрийн жинд олимпын дээд амжилтыг тогтоосон байна. Ингэснээр монголчууд паралимпын наадмаас 2 дахь алтан медаль, олимпын наадмаас 4 дэх алтан медалиа өлгийдөн авах нь тэр.

Монгол Улсын гавьяат тамирчин Э.Содномпилжээ нь пауэрлифтингийн дэлхийн хошой аварга, Ази тавийн аварга, Азийн наадмын аварга,  хувийн дээд амжилтаараа Геннисийн дээд амжилтын номонд бичигдсэн, 2016 оны Рио де Жанейрогийн олимпоос 210 кг-ыг өргөж хүрэл медаль хүртэж байсан юм. Харин “Токио 2021” паралимпын наадмаас алтан медаль хүртсэнээр тэрбээр бөмбөрцгийн тамирчин болж байна. Мөн Монгол улсын хувьд паралимпын наадмаас алт, хүрэл медаль хүрсэн анхны тамирчин, олимпын наадмаас хоёр медаль хүртсэн  манай улсын хоёр дахь тамирчин болж түүхнээ үлдлээ.

Энхбаярын Содномпилжээ нь 1985 оны наймдугаар сарын 24-нд Эрдэнэт хотод төрсөн юм. Тэрбээр ээж, хүүгийн хамт амьдардаг юм.  2016 оны паралимпын наадам, тив, дэлхийн аваргад үзүүлсэн амжилтыг нь үнэлж Орхон аймгийн Засаг дарга асан Д.Батлут Э.Содномпилжээд хүндэтгэл үзүүлж Баян-Өндөр хотхоны  нэг өрөө байраар шагнаж урамшуулж байв.

Э.Содномпилжээ 2001 оны УАШТ-нд 52 кг-д түрүүлсэнээр анхны амжилтаа үзүүлж байсан гэдэг. Дараа нь 2002 оны УАШТ-нд жин өгсөж 56 кг-д хэвтээ шахалтаар мөн л түрүүлж Ерөнхийлөгч асан Х.Баттулгаас алтан медалиа хүртэж байсан нь спортын түүхийн хуудаснаа үлдсэн байна.

Foto: shuud.mn