Аймгийн Онцгой комисс 11.30 цагт мэдээлэл өглөө.  

Энэ үеэр аймгийн Эрүүл мэндийн газрын даргын үүргийг түр орлон гүйцэтгэгч Д.Сүхээ өнгөрсөн 24 цагийн хугацаанд нэмж илэрсэн тохиолдлуудыг нэгбүрчлэн тоочив. Түүний хэлснээр өчигдөр батлагдсан 9 тохиолдол байсан бол 24 цагийн дотор шинээр 12 тохиолдол илэрлээ. Нийт батлагдсан тохиолдол манай аймагт 21 болсон.  Байгууллагаар нь авч үзвэл “Ачит Ихт” компаниас 2, “Тэди” худалдааны төвөөс 1, “Эрдэнэт үйлдвэр” ТӨҮГ-аас 1, дөрөвдүгээр сургуулийн 1 хүүхэд, тавдугаар сургуулийн 1 хүүхэд, Их залуу багт амьдардаг ажилгүй 1 иргэн, Ломбардны 2 иргэн  халдвар авсан гэлээ. Нэмээд үзсэн 9 болчихоод цааш явсангүй. Гурван нөхөр хаанаас гараад ирэв ээ. Эсвэл энэ 3-ыг нуух ямар нэг шалтаг, шалтгаан байв уу, таньд.

Дээр нь 11.00 цагийн Эрүүл мэндийн яамны мэдээлэлд Орхон аймагт шинээр 18 тохиолдол нэмэгдсэн гээд улсын хэмжээнд мэдээлж нийт батлагдсан тохиолдол 46 хэмээн орон даяар зарлачихсан. Өмнөх нь яая гэхэв гэхэд 24 цагийн дотор илрүүлсэн тохиолдол чинь яагаад зөрөөд байна вэ. Бүр Яамны тоог, таны хэлсэнтэй харьцуулбал 6-гаар дутаад байна. Эсвэл нөгөө таны нуугаад байгаа 3 тохиолдол чинь дарга, даамлуудтай холбоотой юм уу.

Нэгэнт л манай аймагт коронавирусийн халдвар нэмж бүртгэгдсэн бол нууж хаагаад байх шаардлага бий юү. Эрдэнэтийн хонхорт нууц юм гэж бараг л байхгүйтэй адил болсон энэ цагт арга барил чинь таалагдахгүй байна. Нөгөө талдаа нуух тусам эрсдэл дагуулдаг. Ойрын жишээ, Дархан-Уул аймагт энэ сарын 25-нд 2 тохиолдол нэмж илэрсэн. Түүний нэг нь Нэгдсэн эмнэлгийнх нь эмч байсан. Тэр хүн тухайн өдрөө ажлаа хийж 100 гаруй хүнд үйлчилгээ үзүүлсэн байна. Ийм эрсдэлтэй, гамшиг дагуулж байгаа үед Д.Сүхээ даргын нуугаад байгаа 3 тоо ч эрсдэлтэй байж мэднэ.