Аймгийн Засаг даргын шуурхай зөвлөгөөний үеэр Засаг дарга С.Батжаргал цаг үеийн нөхцөл байдал хүндэрч Булган аймгийн Могод суманд өвчлөл бүртгэгдсэн зэрэг тодорхой олон шалтгааны улмаас Булган аймгаас орж ирж байгаа хөдөлгөөнийг зогсоох үүрэг өглөө. 

Бид Эрдэнэт хотын баруун урт талд, Оросын булагийн наахна байх хяналтын постод очиж аймгийн Засаг даргын үүрэг даалгаврын биелэлтийн талаар сурвалжилсан юм. Тус постонд гарч байгаа аймгийн Онцгой байдлын ажилтан “Булганаас орж ирж байгаа хөдөлгөөнийг зогсоох үүрэг сая ирэх нь ирсэн. Үүнээс өөр мэдээлэл хийх боломжгүй. Шуурхай штабаас ав. Надад ямар ч эрх мэдэл байхгүй” гэлээ. Биднийг очиход энэ постод хөл хөдөлгөөн ихтэй, замын цагдаагийн хоёр ажилтан иргэдийн хоорондын зайг бариулах, зорчих хэсэг рүү орж ирсэн тээврийн хэрэгслийг чөлөөлүүлэх, зөвшөөрөгдсөн машин тээврийг аюулгүй  нэвтрүүлэх, гаргах гээд ачаалал ихтэй ажиллаж байв. Баруун талаас Эрдэнэт хотыг дайран өнгөрөх гэсэн тээврийн хэрэгсэл, зорчигчийн хөдөлгөөн улам нэмэгдэж байлаа. Зарим иргэдийн хувьд постны наана цаанаас тодорхой дүрэм, журмын дагуу бараа таваараа зөөж ачиж, тээвэрлэж байв.

Сүүлийн үед постон дээр ажиллаж байгаа Онцгой байдлын алба хаагчид мэдээлэл өгөхөөс татгалздаг, дарга даамлуудаасаа айж ичдэг, “Би юу ч мэдэхгүй, надад тийм эрх байхгүй. Та нар шуурхай штабаас л мэдээлэл ав” гэсэн байдлаар асуудалд ханддаг нь иргэдийн мэдээлэл олж авах, мэдэх эрхэнд ч сөргөөр нөлөөлж байна. Эсвэл Онцгой байдлын дарга нар нь постонд ажиллаж байгаа алба хаагч нартаа “Хэвлэлийнхэнд амаа нээвэл ажлаасаа чинь хална шүү” гэдэг тушаал өгдөг юм уу ямар ч байсан газар дээрх нөхцөл байдлын талаарх мэдээлэл хангалтгүй, хаагдмал байна.