Аймгийн Засаг даргын даваа гарагийн шуурхай тодорхой шалтгааны улмаас үдээс хойш 15.00 цагт боллоо. 

Шуурхайг С.Батжаргал дарга гэрээсээ удирдав. Учир нь аймгийн Засаг дарга С.Батжаргал өнгөрсөн 7 хоногт Улаанбаатарт томилолтоор ажилласан. Ирээд тусгаарлалтад 7 хонох дүрэмтэй тул ийнхүү гэрээсээ шуурхай хуралдаанд оролцлоо. Энэ нь Орхон аймгийн 100 гаруй мянган иргэнийг удирдаж байгаа аймгийн Засаг даргын хувьд үлгэр дууриалал болсон хэрэг. Халдварын голомттой бүсээс, тэр дундаа Улаанбаатараас ирэх хэнбугай ч гэрийн тусгаарлалтад 7 хонох ёстой. Аймгийн Онцгой комиссынхон гэрийн тусгаарлалтад орсон иргэдийг техник технологи ашиглан бүрэн хянаж байгаа.

Өвчин хэлж ирэхгүй хийсч ирдэг гэж манайхан ярьдаг. Хамгийн сүүлийн жишээ, Архангайн Хайрхан сум руу зорчсон иргэнээс корона илэрсэн. Шинжилгээний хариугаа хүлээлгүй хувийн унаагаар явсан иргэн дээрх сумын иргэдийг айдас, хүйдэст автуулсан. Нэн ялангуяа, манай аймгийн хувьд эрсдэл хамгийн их. Тиймээс хүн бүр, дарга, цэрэг, УИХ-ын гишүүн гэлтгүй дүрэм журмаа мөрдөж ажиллаж, амьдрах үүрэг бидний өмнө тулгарсан.

Аймгийн Онцгой комиссоос Орхон аймгийн харьяат иргэдээ татан авах шийдвэр гаргасан. Улаанбаатараас ирэх иргэд PSR шинжилгээ өгөөд Сөрөг гэсэн хариу гарсан нөхцөлд нутгийн зүг жолоо залах үүргээ биелүүлэх ёстой. Орос шиг бай л даа гэдэгчлэн Эрдэнэтчүүд аймгийн Засаг дарга шигээ байя л даа.