Аймгийн Засаг даргын 2020 оны арванхоёрдугаар сарын 17-ны А/756 тоот захирамжаар Хотын захирагчийн албаны дарга С.Ганцогтод сайт байгуулахад нь зориулж 9 сая 990 мянган төгрөг гаргаж өгчээ. 

Хэвлэлийн эрх чөлөөний тухай хуульд “... төрийн байгууллага дэргэдээ хэвлэл мэдээллийн хэрэгсэл байгуулахыг хориглоно” гэсэн заалт бий. Дээрх захирамжаас харвал Хотын захирагчийн алба дэргэдээ хэвлэл мэдээллийн хэрэгсэлтэй болж байна. Энэ бол сайн хэрэг биш. Харин өвчин байж мэднэ. Өвчин өвчиндөө “хорт хавдар” ч болж мэдэх аюултай хэрэг.

Маргааш аймгийн ЗДТГ-ын бүх хэлтсийн дарга нар дэргэдээ сайт байгуулна гээд хүсэлтээ гаргаад явбал тус бүртээ 9.9 сая төгрөгтэй болох нь. Хэлтсийн дарга нь зургаа томоор тавиад л. Баяр ёслолоор мэндчилгээ дэвшүүлээд эхэлвэл юу болох бол. Ийм л халдвартай, хамгийн хор хөнөөлтэй, хууль зөрчсөн үйлдлийг өөгшүүлж боломгүй санагдана.

Хотын захирагчийн албанд сайт байгуулахад нь зориулж 9 сая 990 мянган төгрөг олгох тухай аймгийн Засаг даргын захирамж албан ёсных уу, хуурамч уу гэдэгт өөрийн эрхгүй эргэлзэхэд хүргэж байна. Учир нь тус захирамж болоод, захирамжийн хавсралт дээр нэгэн сонирхолтой зүйл байна. Захирамжид “Иргэд олон нийтийг хот байгуулалт,дэд бүтцийн талаарх мэдээллээр хангах, болзошгүй эрсдэлийг урьдчилан мэдээлэх зорилгоор Хотын захирагчийн албаны дэргэд www.erdenetkhot.mn сайтыг хөгжүүлэхэд шаардагдах зардлыг хавсралтаар баталсугай” гэжээ. Захирамжийн хавсралтад мөн л  “www.erdenetkhot.mn сайтыг хөгжүүлэхэд шаардагдах зардал 9 сая 990 мянган төгрөг” хэмээн бичжээ.

Цахимаас www.erdenetkhot.mn гээд хайтал өөр сайт гарч байна. Хотын захирагчийн албаны үндсэн зорилготой хамааралгүй жирийн нэгэн мэдээллийн сайт байх аж. Өнөөх 9.9 сая төгрөгийн үнэтэй, Хотын захирагчийн албаны албан ёсны мэдээллийн хэрэгсэл болох сайтыг нь багагүй хайж, эрэл сурал болж байж сая л нэг www.erdenethot.mn нэртэй болохыг нь олж авлаа. С.Ганцогт дарга  www.erdenethot.mn ийм нэртэй сайт байгуулчихаад төлбөр болох 9.9 сая төгрөгийг www.erdenetkhot.mn сайтын нэрээр гаргуулж авсаныг үнэндээ ойлгосонгүй. Хууран мэхлэлт үү, мөнгө угаалт уу. Аль эсвэл аймгийн Засаг даргын захирамж хуурамч гэж үү. Засаг даргын захирамж ингэж алдаа мадагтай, асуудалтай гардаг гэж бодсонгүй. И-оффис программ дээр захирамжийн эх тавигдаж баахан дарга нар уншиж танилцан цахим гарын үсгээ илгээдэг гэсэн биз дээ.

Эсвэл С.Ганцогт дарга иргэдийг зориудаар төөрөгдүүлэхийн тулд албан ёсны сайтынхаа нэрийг албаар дунд нь үсэг нэмж оруулаад төөрөгдүүлсэн үү.