Засгийн газраас иргэн, аж ахуйн нэгжид үзүүлж байгаа дулаан, цахилгааны хөнгөлөлт цагаа олсон дэмжлэг болсон талаар “Цагийн хүрд”-ээр нэвтрүүллээ. 

Монголын хамгийн том сүлжээ их дэлгүүр “Номин”-гийн Улсын их дэлгүүрийн дулаан, халаалтыг хөнгөлсөн тухай мэдээлэв. Улсын их дэлгүүр 27 мянган метр квадрат талбайтай, өвлийн улиралд дулаандаа сард 24 сая төгрөг төлдөг аж. Түүний 14 саяыг нь Засгийн газрын тогтоолоор төрөөс чөлөөлсөн байна.  “Номин”-гийнхон ч засгийн хөнгөлөлтийг цар тахлын үед цагаа олсон тусламж боллоо гэж ярьж байна.

У.Хүрэлсүхийн Засгийн газраас цар тахлын үед 2020 оны арванхоёрдугаар сарын 1-нээс 2021 оны долоодугаар сарын 1-н хүртэл иргэн, аж ахуйн нэгжийн цахилгаан, дулааны төлбөрт тодорхой хэмжээний хөнгөлөлт, чөлөөлөлт үзүүлэх тухай шийдвэр гаргасан. Түүний үр шимийг монголууд хүртэж байгаа. Харин ачааны хүндийг нь Эрдэнэт үйлдвэрийн уурхайчид нуруун дээрээ үүрч байгаа. Дэлхий нийтийг хамарсан цар тахлын үед эдийн засаг хямарч иргэд халаасаа сэгсрэх дээрээ тулсан хүнд үед энэ шийдвэр хамгийн ач холбогдолтой нь. Гэхдээ юуны түрүүнд төр, засаг хамгийн мундаг нь гэж хэлэхэд учир дутагдалтай санагдана. Иргэн, аж ахуйн нэгжид үзүүлж буй, адаглаад “Номин”-гийн ганцхан салбарт, дулааных нь төлбөрт үзүүлж буй 14 сая төгрөгийн хөнгөлөлт бол “Эрдэнэт үйлдвэр”-ийн уурхайчдын хөлс, хүч, хөдөлмөр шингэсэн байгаад л хамгийн гол учир утга оршино. Өнөөдөр “Эрдэнэт үйлдвэр” нэг өдөр бүү хэл, нэг ч минут зогсох эрхгүйг Монгол улсын өмнө хүлээсэн үүргээ биелүүлээд үйл ажиллагаа нь доголдолгүй ажиллаж байна. Үүнийг уурхайчдын гавьяа гэж хэлэхгүй  байхын аргагүй. Уурхайчдын бүтээсэн баялаг болох тэрхүү 650 тэрбум төгрөгийг  Засгийн газрын зүгээс шийдвэр гаргаж иргэн, аж ахуйн нэгжид хөнгөлөлт болгон олгож байгаа.  

1990-ээд оны эхэн үед П.Жасрайн Засгийн газар Монголын төр цалингаа ч тавих мөнгөгүй суусан тэр цагт “Эрдэнэт үйлдвэр”-ийн Ерөнхий захирал асан Ш.Отгонбилэг тэргүүтэй уурхайчид өгөөмөр гараа сунгасан тухай ахмадуудын дурсамжинд байдаг. Түүх давтагддаг аж. Тэгвэл өнөөдөр Х.Бадамсүрэн захиралтай “Эрдэнэт үйлдвэр”-ийн олон мянган уурхайчин иргэн, аж ахуйн нэгжийн тог, цахилгаан дулааны хөнгөлөлтөд 650 тэрбум төгрөгийн буцалтгүй тусламж үзүүлж байна. Энэ бүхнийг бид уурхайчдын сэтгэлийн өглөг, Эрдэнэт уулын үр шим хэмээн хүлээн авах учиртай. Тус үйлдвэрийн Ерөнхий захирлын Санхүү, эдийн засаг хариуцсан орлогч Д.Үүрийнтуяагийн хэвлэлд өгсөн ярилцлагаас нэгэн тоог сонирхуулъя. Тэрбээр “2021 онд улс, орон нутгийн төсөвт төвлөрүүлэх төлбөр, ногдол ашиг, татвараас гадна Монгол улсын нийт ААН, ард иргэдийнхээ цахилгаан, эрчим хүч, ус, дулаан, хог хаягдлын долоон сарын төлбөрийг төр хариуцах болсон. Үүнийг “Эрдэнэт үйлдвэр” санхүүжүүлэх Засгийн газрын шийдвэр гарсан. Энэ ажлын хүрээнд Сангийн яамтай хамтран ажиллаж байна. “Эрдэнэт үйлдвэр” ТӨҮГ-ын Ерөнхий захирал, Сангийн сайдтай хамтран баталсан журмаар энэхүү төлбөр тооцооны зохицуулалт хийгдэж байна. Сангийн яамны тусгай дансанд энэ мөнгө төвлөрч байгаа. 2021 оны нэгдүгээр сард 60 тэрбум төгрөг байршуулсан бол хоёрдугаар сарын эхээр дахин 30 тэрбум төгрөг байршуулаад байна” гэсэн байдаг.

 Эндээс харвал  “Номин”-д ч иргэн та бидэнд ч үзүүлж буй тог, цахилгааны энэхүү хөнгөлөлтийн мөнгө бол төсөвт төвлөрүүлэх төлбөр, ногдол ашиг, татвараас гадна уурхайчдын хөдөлмөрөөр бүтсэн баялагийн үр жимс нь болж болж таарах нь.    

Зууны манлай бүтээн байгуулалт Орхон аймаг, дэлхийн тэргүүлэх уул уурхайн үйлдвэрүүдийн нэг “Эрдэнэт үйлдвэр”-ийн 6800 гаруй уурхайчны хүч хөдөлмөр, Эрдэнэт хэмээх энэ уулын хишиг буян монгол өрх бүрт, хүн бүхэнд тэгш хүрч байна. Эрдэнэт үйлдвэрийн уурхайчдын алдар бадраг.