Нутгийн удирдлагын ордны өмнөх автобусны буудлын баруун талд агаарын чанарын үзүүлэлтийг хэмждэг нэгэн самбар байдаг байлаа. Бас болоогүй ээ, түүн дээр цаг агаарын мэдээ гардаг. Түүнийг нь иргэд их хардаг байсан. Гэтэл тэрхүү самбар нэгдүгээр сарын сүүлчээр нэг хэсэг ажиллахгүй байснаа одоо бүр байхгүй болчихсон.

Үгүйлж, хайж байгаа дарга  албан тушаалтан гэж алга. Арга ч үгүй л дээ. Дарга бүхэн автомашинаар явдаг болохоор харах ч үгүй байлгүй. Уг нь иргэдэд адаглаад л тухайн өдрийн цаг агаарын мэдээг хүргэдэг байсан тэр самбар хэрэгтэй эд л дээ.

Гэтэл сураг сонсох нь аймаг, орон нутгийн зүгээс багагүй хэмжээний хөрөнгө, мөнгө, хүн хүч гарган аймгийн хэмжээнд агаарын бохирдлын судалгааг хийж байгаа тухай мэдээлэл энд тэндээс байнга гарах боллоо. Аймгийн Байгаль орчин, аялал жуулчлалын газрын  дарга С.Жаргалсайхан энэ талаар Засаг даргын шуурхайд “Судалгаа хийж байгаа хүмүүсийг дэмжиж бичгийн цаас, амны хаалтаас эхлээд манай байгууллагаас багагүй хэмжээний хөрөнгө мөнгө гаргаж байгаа” гэж дуулгасан удаатай. Өнөөдөр агаарын чанарын үзүүлэлтийг хэмждэг самбарын талаар сураглатал өөдөөс “ Буруу хэмжээд байхаар нь буулгачихсан ч юм билүү. Агаарын бохирдлын судалгаа хийж байгаа энэ үед энэ самбар хэрэггүй ш дээ. Агаарын чанар муу гэж гарвал их мөнгөөр бага ажил хийх гэж л буулгасан болов уу” хэмээн нэгэн эрхэм шогширсон юм.

Уг нь агаарын бохирдлын судалгааг хийж байгаа бол зэрэгцүүлээд агаарын чанарын үзүүлэлтийг мэдээлдэг самбарыг ажиллуулахад юу нь болохгүй байгаа юм бол. Ямар ч байсан манай аймгийн дарга нар иргэдийнхээ амнаас “Агаарын бохирдол их, агаар муу, утаа их” гэсэн үг унагахын тулд энд байсан самбарыг хуу татаад авчихна гэж баймааргүй л юм. Цаасан дээ, амаар авсан судалгаа үнэнийг хэлэх үү, шинжлэх ухааны дэвшилтэт техник технологи арай бодит байдлыг харуулах уу гэдэг дарга нар хариу өгөх нь зөв байх.