Аймгийн Засаг даргын шуурхай зөвлөгөөний төгсгөлд С.Батжаргал дарга албан тушаалтнуудад үүрэг өгдөг. Түүнийг нь 7 хоногийн дотор хэрхэн биелүүлсэнээ Засаг даргад тайлагнадаг. Хоёр ч шуурхайн өмнө байна уу, С.Батжаргал дарга “Үүрэг даалгаврын биелэлтийг ингэж хийхгүй ээ. Үүрэг даалгаврын биелэлтийг ийм байдлаар ирүүлэхгүй. Ажил хэрэгч байдлаар хий л дээ” хэмээн бухимдсан.

Гэтэл өнөөдөр бодит байдал бахь байдгаараа аргацаасан, хуурсан байдалтай хэвээрээ байна. Тухайлбал, аймгийн Засаг даргаас ”Цахилгаан, дулааны эрчим хүчний хангамжийн байгууллагууд хэвлэлийн бага хурал хийж иргэдээс ирүүлсэн төлбөр тооцооны асуудлаар хариулт өгөх, мэдээ мэдээллийг хүргэж ажиллах” албан даалгавар өгсөн. Өнгөрөгч даваа гарагийн шуурхайд "Эрдэнэт Ус” ОНӨХК-ийн захирал Д.Бүүвэйбаатар хэвлэлийн байгууллагад иргэдийн асуултад хариулт өгч ажилласан. ЭБЦТС ТӨХК нь цахилгаан хэмнэх талаар иргэдэд зориулан богино хэмжээний шторк хийж, хэвлэл мэдээллээр түгээн сурталчлаж байна” гэсэн хариулт өгсөн.

Харин Д.Бүүвэйбаатар дарга ямар ч хэвлэлийн бага хурал хийгээгүй. Хэвлэл мэдээллийн зарим нэг байгууллагын сэтгүүлчийн асуултад л хариулсан. Иргэдийн мэдэх эрхийн хүрээнд надад ч уншигчийнхаа өмнөөс асуух асуулт байсан. Д.Бүүвэйбаатар даргыг хэзээ хэвлэлийн хурал зарлахыг хүлээсээр 7 хоносон. Орон нутгийн сонгуулиас хойш Д.Бүүвэйбаатар дарга хэвлэлийнхэнээс бага зэрэг зайгаа бариад эхэлсэн. МАН, сонгууль тойрсон олон асуултад түүний хариулт хамгийн сонирхол татах сэдэв л дээ.

Шуурхай даргалагчаас “Орхон АЗЗА”-д дөрвөн эгнээ автозамын голын цас, мөсийг арилгах хугацатай үүрэг өгсөн. Энэ үүрэг даалгавар биелэгдээгүй. Тус байгууллагын дарга нь Шуурхай зөвлөгөөнд онлайнаар ч оролцсонгүй. Үүнд бухимдсан С.Батжаргал дарга “Зам тээврийн яаманд албан бичиг явуул. Энэ хүнийг гуйж ажиллуулахгүй” гэлээ.