Орхон аймагт сүүлийн 15 хоногт халдварын тохиолдол нэмж бүртгэгдээгүй.

Ковид 19 цар тахлаас үүдэлтэй хүний амь нас эрсдээгүй байхад Орхон аймгийн хэмжээнд ахуйн хүрээний архидалт нэмэгдэж, архи согтууруулах ундааг хэтрүүлэн хэрэглэснээс үүдэн 4 хүн амь насаа алджээ.

Орон нутгийн удирдлагаас дотоодод алдагдсан халдварыг бүрэн хяналтандаа авч чадсанаар хувь хүний ухамсарт найдаж хөл хориог сулруулсан. Ингэснээр санхүүгийн уналтанд ороод байсан ард иргэдийн амьдрал хэвийн горимд шилжсэн. Гэвч хөл хориог сулруулсанаар иргэд архи, согтууруулах ундааг хэтрүүлэн хэрэглэж  улмаар гүн хордлогонд орж байна. Тодруулбал, өнгөрсөн 7 хоногт Орхон аймгийн БОЭТ-ийн яаралтай тусламжийн 103 утсанд нийт 379 дуудлага ирсний 39 нь архины гүн хордлого, архинаас хамаарсан өвчлөл байна. Үүнээс 4 иргэн архины гүн хордлого буюу архи хэтрүүлэн хэрэглэсэн шалтгаанаар амь насаа алдсан байна.

Хөл хорио суларсан сүүлийн 14 хоногийн хугацаанд аймгийн БОЭТ-ийн яаралтай тусламжийн төвөөр үйлчлүүлж байгаа иргэдийн 10-12 хувь нь архи согтууруулах ундаатай холбоотой осол, гэмтэл өвчлөлүүд түүний хүндрэлүүд байна. Өчигдрийн байдлаар яаралтай тусламжийн төвөөр нийтдээ 40 хүн үйлчлүүлсэнээс 4 нь согтуу, согтуугийн осол гэмтлээр 6 хүн ирсэн байна. Иймд эрүүл мэндийн байгууллагаас ард иргэддээ “өөрийн болон бусдын эрүүл мэндийг бодож архи, согтууруулах ундаанаас аль болох татгалзаж, батлагдсан дүрэм журмаа мөрдөх”-ийг уриалж байна. Архи, согтууруулах ундааг хэрэглэх үедээ хэтрүүлэхгүйгээр зөв, зохистой хэрэглэж байхыг анхааруулж байна.

Р.Ханд