Орхон аймгийн төсвийн ерөнхийлөн захирагчийн багцад хамаарах төсөвт байгууллагуудын нягтлан бодогчид Нягтлан бодох бүртгэлийн бодлогын баримт бичигтэй боллоо. Энэхүү бодлогын баримт бичгийг Нягтлан бодох бүртгэл хөгжүүлэх сан, Орхон аймгийн ЗДТГ-ын Санхүү, төрийн сангийн хэлтсийн дарга Н.Бямбацэцэг, аймгийн төсвийн ерөнхий нягтлан бодогч С.Энхтүвшин, аймгийн төсвийн  хөрөнгө оруулалтын ахлах мэргэжилтэн О.Энхбаяр нар боловсруулж эмхэтгэн гаргажээ.

 Бодлогын баримт бичигтэй болсонтой холбогдуулан Нягтлан бодох бүртгэлийн хөгжүүлэх сангийн захирал Монгол улсын гавъяат эдийн засагч, доктор, профессор, мэргэшсэн нягтлан бодогч С.Батжаргал манай аймагт төсвийн байгууллагын нягтлан бодогчдын дунд сургалт зохион байгуулав.

     Энэхүү сургалтанд Орхон аймгийн төсвийн багцад хамаарах 70 гаруй нягтлан бодогч хамрагдаж улсын секторын нягтлан бодох бүртгэлийн олон улсын стандарт болон Төсвийн тухай хууль, Сангийн сайдын гаргасан журам заавруудын дагуу гаргасан тус бодлогын баримт бичгийн талаарх ойлголтыг авч байна. Тус бодлогын баримт бичгийг боловсруулах болсон гол шалтгаан  нь төрийн аудитын байгууллагаас бодлогын баримт бичигтэй бол гэсэн шаардлагыг тавьдаг. Тэгвэл нягтлан бодох бүртгэлийн бодлогын баримт бичигтэй болсоноор  аудитын шалгалтад бүдрэхээргүй болжээ. Ийнхүү Орхон аймаг нь улсын хэмжээнд Нягтлан бодох бүртгэлийн бодлогын баримт бичгийг боловсруулсан 3 дахь аймгаар шалгарч байна.