Аймгийн Засаг даргын Зөвлөлийн хурал боллоо. Хурлаар 2020-2021 оны өвөлжилтийн бэлтгэл ажлын явцыг хэлэлцэв. Мөн иргэд,, аж ахуй нэгж байгууллагаас ирүүлсэн ус дулаан, тог цахилгаантай холбоотой асуудлыг тусгайлан авч ярилцсан юм. 

Учир нь сүүлийн үед аймгийн хэмжээнд хийгдэж байгаа хөрөнгө оруулалт, бүтээн байгуулалтын ажлуудыг хийж байгаа зарим гүйцэтгэгч компаниуд ажлын хариуцлага алдаж албан байгууллагын тог, цахилгааныг таслах явдал багагүй гаргах болжээ. Тухайлбал, Баян-Өндөр сумын Хүрэнбулаг багийн 4-16-дугаар байрны гаднах тохижилтын ажлыг гүйцэтгэж байгаа “Орхон нүнжиг” компанийн асуудал өндөр авч яригдлаа. Эднийх  ажил гүйцэтгэж байх явцдаа цахилгааны кабелийн утсыг тасалснаас болж аймгийн Номын төвийн цахилгаан тасарч 5 хоногийн нүүрийг үзээд байгаа аж. Номын төвийн ажилчдын зүгээс тайлбарлахдаа  “... өнгөрөгч ням гарагийн үдээс хойш тог тасарсан. Тухайн гүйцэтгэгч компанийн ажлын хариуцлагагүйгээс болж манайх хэвийн үйл ажиллагаа явуулахад хүндрэлтэй байгаа” гэлээ.

Аймгийн Засаг даргын Бүрэн эрхийг хэрэгжүүлэгч С.Батжаргал “Энэ удаад ганц Орхон нүнжиг компаниар тогтохгүй хэд хэдэн удаагийн ийм хариуцлагагүй үйлдэл гаргасан. Мэргэжлийн байгууллага болох Эрдэнэт Булганы цахилгаан түгээх сүлжээ компанийнхан яаж ажиллаж байна вэ. Хотын хэмжээний цахилгааны кабель утас тасдчихдаг. Тэгээд залгасан болоод орхидог байдал газар авлаа. Энэ нь цаашдаа тухайн цахилгааны кабель утасны эдэлгээ, аюулгүй байдалд ч асуудал дагуулж байна. Яаралтай, өнөө маргаашийн дотор тогийг залгаж Номыг төвийг цахилгаантай болго” хэмээсэн юм.

“Эрдэнэт Булганы цахилгаан түгээх сүлжээ” ТӨҮГ-ын ерөнхий инженер н.Мөнх-Эрдэнэ “Орхон нүнжиг компанийнхантай уулзсан. Тэдний буруутай үйл ажиллагаанаас болж Номын төв тоггүй хэд хонож байна. Ийм тохиолдол гурван ч удаа давтагдлаа. Манайх ийм тохиолдолд арга хэмжээ авах эрх байхгүй. Мэргэжлийн хяналтынханд ханддаг. Тэндээс тухайн компанид Зөрчлийн хуулиар торгох арга хэмжээ авдаг. Манайх цахилгааныг хэвийн болгох үүрэг өгдөг” хэмээсэн юм.

Харин Номын төвийг бүтэн 5 хоног тог, цахилгаангүй болгож орхисон “Орхон нүнжиг” компанийн зүгээс тайлбар хийхийн оронд “Бид алдаа гаргасан, та нарт хамаагүй, засч байна. Яах гээд байна аа” хэмээн өөрсдийгөө өмөөрч асуудалд хандаж байлаа.