“Эрдэнэс-Тавантолгой” ХК-ийн Төлөөлөн Удирдах Зөвлөл хувьцаа эзэмшигчиддээ ногдол ашиг өгөх шийдвэр гаргасантай холбогдуулан өнөөдөр /2020.02.17/ Уул уурхай, хүнд үйлдвэрийн сайд Д.Сумьяабазар, “Эрдэнэс-Тавантолгой” ХК-ийн ТУЗ-ийн дарга Б.Баярсайхан болон Гүйцэтгэх захирал Б.Ганхуяг нар мэдээлэл өглөө. Нэгж хувьцаанд 90 төгрөг олгох бөгөөд 1072 ширхэг хувьцаатай иргэнд 96480 төгрөг оногдож байна. 

Компанийн тухай хуулийн дагуу Төлөөлөн удирдах зөвлөлөөс гаргасан уг шийдвэрийг энэ оны 05 дугаар сарын нэгний дотор Хувьцаа эзэмшигчдийн хурлаар хэлэлцүүлнэ. Мөн Санхүүгийн зохицуулах хорооны ногдол ашиг хуваарилах шинэ журмын дагуу 2020 онд Үнэт цаасны төвлөрсөн хадгаламжийн төвөөр дамжуулан хувьцаа эзэмшигчдэд ногдол ашгийг олгох юм. Ингэхдээ иргэд хувьцааны дансаа баталгаажуулсан байх ёстой.

Мөн ногдол ашиг тараах шийдвэртэй холбоотойгоор ЕТТ нэгдсэн бүртгэлийн аппликейшнийг танилцууллаа. Уг аппликейшнийг татаж авснаар иргэд хувьцааныхаа тоо ширхэгийг шалгах, хянах, мэдээ мэдээлэл авах, санал өгөх зэргээр ашиглаж цаашдаа ЭТТ компанитай хувьцаа эзэмшигчийн зүгээс холбогдох, хөрөнгийн зах зээлд оролцох бүрэн боломжтой болох юм.

Энэ  тухай мэдээллийг компанийн вэб сайт, пэйж хуудас, Эрдэнэс-тавантолгой апликейшн, 1072 пэйж хуудас болон 1800-1072 тусгай утас гэсэн зөвхөн албан ёсны эх сурвалжаас авах шаардлагатай. Үүнтэй холбоотойгоор Хувьцаа эзэмшигчдийн хурал хүртэл даваа гараг бүрийн 13:00 цагт  ЭТТ ХК-иас ногдол ашиг болон компанийн үйл ажиллагаатай холбоотой мэдээллийг тогтмол хүргэж байх юм байна. 

“Эрдэнэс-Таван толгой” ХК-ийн захирал Б.Ганхуяг:

-“Эрдэнэс-Таван толгой” ХК 1 тэрбум 30 сая долларын ашигтай ажилласан. Иргэддээ анх удаа ногдол ашиг олгох гэж байна. 2016 оноос хойш ашигтай ажиллаж байгаа. МУ-ын төрийн компани маш сайн ажилладгийн жишээ. 2 сая 511мянган  хувьцаа эзэмшигч ба төрд ногдол ашгийг нь олгоно. 1072 хувьцаатай 1 сая 82 иргэн, 97 мянган төгрөг хүртэнэ. 741 хувьцаатай хүн 66 мянгын ногдол ашиг авна. 580 мянган иргэн хувьцааны бүртгэлийг хийлгээгүй. Эдгээр иргэдийн бүртгэлийг хувьцаа эзэмшигчдийн хурал эхлэх хүртэл бүртгэнэ. Өнөөдөр ногдол ашиг шууд дансанд орохгүй. Нэгдүгээрт, бүртгүүлнэ. Хоёрдугаарт, хувьцаа эзэмшигчдийн хурал болж батална. Баталснаар тавдугаар сараас өгч эхэлнэ. Ногдол ашиг олгох талаар нэг цонхны мэдээллийг өгч ажиллаж эхэлнэ. Гар утасны апп ба вэб сайтуудаар дамжуулна. Манай албан ёсны пэйж хаягаар хэдэн хувьцаатай, ямар ногдол ашиг олох талаар мэдээлэл авна. “1072” мэдээллийн төвөөс даваа гараг болгонд мэдээлэл өгнө. Бүртгэгдсэн иргэдийн талаар мэдээлэл өгнө. Онлайнаар бүртгэх боломж бүрдүүлж өгсөн. Төвлөрсөн хадгаламжийн төв дээрх хувьцааны мэдээллийн дагуу нэг арилжааны банкны мэдээллийг өгнө.

Уул уурхай, хүнд үйлдвэрлэлийн сайд Д.Сумъябазар:

-Компанийн тухай хууль, “Эрдэнэс-Таван толгой” ХК-ийн дүрмийн дагуу 1072 хувьцааны ногдол ашгийн асуудлыг удирдах зөвлөлөөр оруулж шийдлээ. Анх удаа ногдол ашиг өгөх гэж байна. Өмнө нь зарим иргэдээс хувьцааг нь бэлэн мөнгөөр худалдаж авч байсан. Энэ бол бэлэн мөнгө өгч байгаа бус харин ногдол ашиг өгч байгаа юм. Ногдол ашигт нэгж хувьцаанд 25 төгрөг өгөхөөр байсан. Төмөр зам ашиглалтад орсноор борлуулалт нэмэгдсэн тул 1 тэрбум 30 саяын орлого олсон. Ингээд нэгж хувьцаанд 90 төгрөг хуваарилахаар шийдсэн. Заримдаа төмөр зам, дагалдах төслүүд хэрэгжсэнээр нэгж хувьцаанд ногдох ашиг нэмэгдэх нь гарцаагүй.

Эх сурвалж: "ett.mn"