“Эрдэнэт хотын өдөр”-ийг бид өргөн дэлгэр, нижгэр тэмдэглэн өнгөрүүллээ. Жил бүрийн арванхоёрдугаар сарын 11-нд болдог энэ өдрийг төр хувийн хэвшлийн байгууллага гэлтгүй эрдэнэтчүүд эрвийх дэрвийхээрээ хөдөлж баяр ёслолын байдалтай тэмдэглэсэн. Хотын сайн сайхны төлөө хийсэн, байгуулсан бүтээн байгуулалт дундаас Худалдаа хөгжлийн банкны хамт олны хийсэн гэрлэн чимэглэл бусдаас онцгой байлаа. Үдшийн цэнгүүнд оролцохоор явж буй иргэдийн тэр дундаа залуусын хувьд энэхүү гайхамшигт гэрлийн дор зургаа татуулж, сельфи хийж, бүр зарим нэг нь ямар гоё юм бэ. Нийслэлд ч ийм гэрэлтэй гудамж байдаг билүү манайхаан” хэмээн дуу алдаж байгаа тэднийг хараад энэ хамт олноор бахархаж явсанаа нуух юун.

Худалдаа хөгжлийн банкны Эрдэнэт хотын өнгө төрхөд шинэ дүр зураг, шинэ орчин бий болгосон энэхүү туршлагыг манайхан хүлээн зөвшөөрч хотдоо нутагшуулахсан. Юун хэдэн жилийн өмнө “Монголын зэс корпораци”-ийнханы хийсэн “Гэрэлт гудамж”. Гэхдээ энэ компанийнхан Эрдэнэтэд энэхүү ажлыг анх тэргүүнд санаачилсан нь үнэн.

Банк л гэхлээр өндөр хүүтэй зээл өгдөг, зээлийнхээ хүүгээр иргэдийг шулдаг гэдэг хэвшмэл ойлголт нийгэмд тогтсон. Тэр бүхэнд Худалдаа хөгжлийн банкны энэхүү гэрэлтүүлэг бага ч атугай эерэг хандлага төрүүлж байгааг хүлээн зөвшөөрөх хэрэгтэй. Хаанахын хэн гэдэг, ямар эзэнтэй байх нь хотын өнгө төрхөнд нэг их сонин биш. Харин Эрдэнэт хотын гудамж гэрэлтэй, гэгээтэй байх нь өнөөдөртөө нэн тэргүүнд хэрэгтэй. Тэгээд ч манай залуус нэгэн хамтлагийн “Хотын гудамжинд шөнө болдоггүй” хэмээх дууг аялах дуртай. Урин дулаан цагт бол Урт цагааны зүүн талын гудамжинд үнэхээр шөнө болохгүй байх аятай, тухтай залуусын шинэ орчныг Худалдаа хөгжлийн банкныхан үнэхээр бүрдүүлж чаджээ.

Ирэх оны арванхоёрдугаар сарын 11-нд болох “Эрдэнэт хотын өдөр”-ийг Худалдаа хөгжлийн банкны өмнөх энэхүү гэрэлт орчин шиг гэрэл гэгээтэй олон олон гудамж, талбайтай угтахыг эрдэнэтчүүд хүсч, хүлээж байгаа. Тэгээд ч тэр үед бид хууль ёсны дагуу Эрдэнэт хотын иргэний статустай, унаж яваа машины дугаар нь ЭТА болчихсон хараа дээгүүр, сэтгэл тэнэгэр, холын бодолтой баяраа тэмдэглэнэ гэж бодож байна. Энэ бүхний түүчээ нь Худалдаа хөгжлийн банкны хамт олны сэтгэл шингэсэн энэхүү бүтээн байгуулалт байлаа. Энэхүү бичвэр  маань дээрх хамт олны захиалгаар, хүсэлтээр тэрлэгдсэн зүйл огт биш гэдгийг хэлэх нь зөв болов уу. Эрдэнэт хотын иргэний хувьд сайн сайхан бүхнийг байгаа байдлаар нь нийгэмд иргэдэд хүргэх нь сэтгүүлчийн үүрэг. Хаана, хэн хотын сайн сайхны төлөө бүтээн байгуулалт хийж байна түүнийг уншигчиддаа хүргэх болно.