Одоогоос 30 жилийн өмнө Монгол оронд өрнөсөн Ардчилсан хувьсгалын оч нь тэртээ 1989 оны арванхоёрдугаар сарын 3-нд Эрдэнэт хотод, бүр тодруулбал Урт цагааны гудамжны зүүн доод үзүүрт байх “Цасанцар” кафены өмнөөс эхэлсэн жагсаал Эрдэнэтийн төв талбайд хүрч тухайн үеийн эрх баригчдын өмнө хэнээс ч айлгүйгээр үзэл бодлоо илэрхийлж, үгээ хэлж байсан тэр цаг үеэс эхтэй билээ.

Түүний дараахан хэсэг уран бүтээлч залуус нэгдэн Эрдэнэт хотноо “Эв нэгтний холбоо” буюу “ЭНХ” нэртэй бүлгэм байгуулж, улмаар анх удаа чөлөөт хэвлэл сонин гаргасан гээд нэрлээд байвал ардчиллын анхдагчдын түүх дуусашгүй.

Гэрэл зургийг "mpa.mn"

Тэгвэл тэрхүү цуглаанд оролцож “ЭНХ” холбооны тэргүүн эгнээнд явсан өнөөгийн эрдэнэтчүүдийн хувьд “зураач Батбилэг”, “уран бүтээлч Батбилэ”г, залуусын хувьд “Билгээ ах” нь өнөөдөр Монгол улсын Ерөнхийлөгчийн зарлигаар Үйлчилгээний гавьяат ажилтан цол, тэмдгээр шагнуулсан байна. Ийнхүү Эрдэнэтийн Ардчилал анхдагчдаас анхны гавьяат цолтон төрлөө. Зураач, уран бүтээлч Д.Батбилэгийн хувьд нэлээн хэсэг хугацаанд Лондон хотод ажиллаж амьдарч байгаад эх орондоо ирсэн. Ирсэн даруйдаа Эрдэнэтийн шинэ цагийн бүтээн байгуулалтад оролцож явжээ. Тэрбээр та бидний сайн мэдэх гуравдугаар микрийн 22 дугаар байрны ханан дээрх цагаан морин жилийн ардчилсан хувьсгалд зориулсан морины зураг, Гиндерекцийн өмнөх “Анхдагч илгээлтийн эздэд зориулсан хөшөө”-ний эх загварыг гаргасан байна.  Мөн “Хөх Монгол” цогцолборын ханан дээрх зургуудийг бусад уран бүтээлчдийн хамтаар туурвисан юм. Ийнхүү Эрдэнэтийн Ардчиллынхан, Эрдэнэтийн МоАХ-ныхон гавьяаттай боллоо.