Монгол улсын Ерөнхий сайд У.Хүрэлсүх энэ намар манай аймгат айлчилсан. Энэ үеэрээ тэрбээр Эрдэнэтчүүд бидэнд 14 сая ам.долларын бэлэгтэй ирсэн. Эрдэнэт хотын иргэдийн хувьд тулгамдсан асуудлын нэг нь яах аргагүй үерийн далан барьж байгуулах. Үе үеийн Засаг дарга нар энэ ажлыг хөөцөлдөж, зураг төсөв зохиохоос эхлээд хөрөнгө оруулалтын талаар хөөцөлдөж байсан удаатай. Тэгвэл ямар ч байсан Ерөнхий сайдын бидэнд барьсан бэлэг бол Үерийн далан барих 14 сая ам.долларын хөрөнгө байлаа.  

Европын сэргээн босголт хөгжлийн банкны санхүүжилтээр Орхон аймагт үерийн нэгдсэн далан барих, инженерийн шугам сүлжээг тэлэх төслийг хэрэгжүүлэхээр төлөвлөөд байна. Техник эдийн засгийн үзүүлэлтийг боловсруулахаар олон улсын баг манай аймагт ажилласан. Нийтдээ 14 сая ам.долларын санхүүжилтээр гэр хорооллын Эрдэнэ, Даваат ,Шанд багуудыг төвийн дулаанд холбох, бүх багуудад үерийн далан байгуулах юм. Энэхүү томоохон төсөл  хэрэгжсэнээр нийт хөрөнгө оруулалтын 50 хувийг буцалтгүй, 50 хувийг эргэн төлөгдөх хэлбэрээр санхүүжилт болгон авна.  Төслийг  хэрэгжүүлэхэд нийтийн сонсголын зохион байгуулах шаардлагыг Европын сэргээн босголт хөгжлийн банкнаас тавьжээ.