“Эрдэнэт хотын бодлого, судалгааны хүрээлэн” ТББ-ын тэргүүн, Эрдэнэтийн “ББ” буюу Бат-Өлзийн Бат-Эрдэнэ энэ удаад хөгжлийн бэрхшээлтэй, иргэн, хүүхдүүдэд гэнэтийн бэлэг барьлаа. Тэрбээр Эрдэнэт хотын  хөгжлийн бэрхшээлтэй 20 иргэн, таван хүүхдэд нэн шаардлагатай хэрэгсэл болох тэргэнцэр бэлэглэсэн юм. Мөн Баян-Өндөр сумын “Үйлс бадрах” зэрэг зарим өрхийн эмнэлэг, хөгжлийн бэрхшээлтэй хүүхдийн “Найдвар” төв, ”Итгэлийн мод” ТББ-ын хүүхэд багачуудад тэргэнцэр, суурин даралтны аппарат бэлэглэж тэдэнд ирээдүйдээ итгэх итгэл өгч, баярт умбууллаа.

Өнөөдрийн байдлаар манай аймаг 120 гаруй мянган иргэн, 37 мянган өрхтэй. Тэдний нэлээдгүй хэсгийг хөгжлийн бэрхшээлтэй иргэн, хүүхэд багачуул эзэлдэг. Хөгжлийн бэрхшээл гэдэг зүйл хувь хүн, гэр бүлийн асуудал байсан бол “Эрдэнэт хотын бодлого, судалгааны хүрээлэн” ТББ, “Гэрэлтэй Эрдэнэт” төслийн залуус тэднийг нийгэмшихэд, сэтгэл зүрхээрээ  “Би Эрдэнэт хотын иргэн” хэмээн омогших сэтгэл төрүүлэхүйц арга хэмжээг зохион байгууллаа. Зохион байгуулагчдын хувьд аймаг, орон нутагтай хамтран хөгжлийн бэрхшээлтэй иргэн, хүүхдийн судалгааг баг бүрээр гаргасанаар дөрван настай хүүгээс эхлээд 91 настай азай буурал тэргэнцэртэй болсондоо баярлаж  байлаа. Тэдний дунд “Ээж хүү хоёр одоо өдөр бүр гадаа гарч нарладаг болох нь” хэмээн баярын нулимсаа арчиж байсан бол “Аав минь нэг давхарт амьдардаг ч тэр болгон гарч чаддаггүй байлаа. Одоо аавыгаа өдөр болгон гадаа гаргана аа”  хэмээн инээн зогсох иргэд “Эрдэнэт хотын бодлого, судалгааны хүрээлэн” ТББ-ын тэргүүн Бат-Өлзийн Бат-Эрдэнэд баярласан талархсанаа илэрхийлж, ажилд амжилт хүсч байлаа.

Хүүхдийн тэргэнцэр нь гар тоормосноос эхлээд суудлын бүстэй, өндөр настай иргэдэд зориулсан тэргэнцэр нь дороо хөтөвчтэй байсан нь чухам л хөгжлийн бэрхшээлтэй иргэдийн хүсэн хүлээсэн эд болсон юм. “Аймаг, орон нутгийн зүгээс төрийн байгууллагуудад хөгжлийн бэрхшээлтэй иргэдэд төрийн үйлчилгээг хүндрэлгүй, чирэгдэлгүй үйлчлэхийн тулд налуу шат хийлгэсэн. Барилгын тухай хуульд хөгжлийн брэхшээлтэй иргэдэд зориулсан налуу замтай байна гэж заасныг амьдралд хэрэгжүүлж байгаа. Цаашдаа эдгээр иргэдийнхээ зорчих замыг байгуулах, гэрлэн дохиог дуутай болгох чиглэлээр хийж, хэрэгжүүлэхээр зэхэж буй олон ажил байгаа” талаар аймгийн Засаг даргын орлогч А.Түвшинжаргал онцолж байлаа. “Эрдэнэт хотын бодлого, судалгааны хүрээлэн” ТББ-ын “Гэрэлтэй Эрдэнэт” төсөл хөгжлийн бэрхшээлтэй иргэдийнхээ хамтаар гар гараасаа хөтлөлцөн аз жаргалтай Эрдэнэтийн иргэдийн төлөө ажиллаж байна.