Аймгийн ИТХ-ын Төсөв санхүүгийн хөгжлийн хороо хуралдлаа. Хуралдаанд  Санхүүгийн хяналт, аудитын албанаас Шилэн дансны хуулийн хэрэгжилтийн талаар мэдээлэл өглөө. Засаг даргын төсвийн багцад хамаарах 79 байгууллагад улирал бүр дотоод аудит хийдэг. Эдгээр байгууллагууд  Шилэн дансны нэгдсэн цахим хуудсанд мэдээллээ байршуулдаг юм. Төсөв гүйцэтгэл, хөрөнгө оруулалт, тендер, худалдан авалт болон бусад мэдээллийг оруулдаг. Санхүүгийн хяналт, аудитын албанаас хийсэн дотоод аудитын дүн нэг, хоёрдугаар улиралд 96 хувьтай гарсан байна. 

Санхүүгийн хяналт, аудитын албаны дотоод аудитор Л.Булганцэцэг “Эхний улиралд долоон байгууллага, хоёрдугаар улиралд гурван байгууллага “хангалтгүй” үнэлүүлсэн. Хоёрдугаар улиралд Баян-Өндөр сумын “Сум хөгжүүлэх сан”, 14 болон 20 дугаар сургууль Шилэн дансны хуулийн хэрэгжилт хангалтгүй байсан. Ерөнхий боловсролын 14 дүгээр сургуулийн хувьд улирал дараалан алдаа дутагдалтай байсан учраас албан шаардлага хүргүүлсэн” тухай ярьсан юм.

Төсөв, санхүүгийн хөгжлийн хорооны хуралдаанд төлөөлөгч нар хэд хэдэн асуудлыг тодрууллаа. Аймгийн ИТХ-ын төлөөлөгч И.Баасанжав Шилэн дансны цахим хуудсанд мэдээллээ бүрэн оруулаагүй, удаа дараа  алдаа гаргасан албан хаагчдад ямар хариуцлага тооцохыг асуулаа.

Хоёр улирлын турш хангалтгүй үнэлүүлсэн 14 дүгээр сургуулийн мэдээлэл оруулагч, нягтланд арга хэмжээ авахыг сануулсан байна. Төрийн албаны тухай хуулиар удирдах ажилтанд мэдээлж, тухайн ажилтанд хариуцлага тооцдог байна. Орхон аймгийн  ИТХ-ын Төсөв, санхүүгийн хөгжлийн хорооноос манай аймагт шилэн дансны бүртгэл, хөтлөлт жигдэрсэн байна гэдгийг онцолж байсан юм. Нийт дүнгээр аймгийн хэмжээнд Шилэн дансны хэрэгжилт хоёрдугаар улиралд 96.6 хувьай гарчээ.