Эрдэнэтчүүдийн хувьд хамгийн тулгамдсан асуудлын нэг нь үерийн далан барих тухай. Үе үеийн аймаг, орон нутгийн удирдлагууд үерийн далангийн зураг төслийг боловсруулж хөрөнгийн эх үүсвэрийн талаар Засгийн газар болон УИХ-д удаа дараа тавьж байжээ. Тэгвэл өчигдөр Эрдэнэт хотод ажилласан Ерөнхий сайд У.Хүрэлсүх бидний өмнө нэн түрүүнд тулгамдаж байсан үерийн далан барих хөрөнгийн эх үүсвэр болох 14 сая ам долларын асуудлыг шийдсэн тухай мэдээг дуулгалаа.

Эрдэнэт хотын үерийн даланг Европын сэргээн босголт, хөгжлийн банкны 14 сая ам.доллараар хийхээр болжээ. Ингэхдээ 7 сая ам.доллар нь хөнгөлөлттэй зээл байх гэнэ. Харин үлдсэн 7 сая ам.доллар нь эрдэнэтчүүд бидэнд зориулж Европын сэргээн босголт хөгжлийн банкнаас буцалтгүй тусламжаар олгох юм байна. Ийнхүү эрдэнэтчүүд зуны борооны үер, хаврын шар усны үерээс айх аюулгүй амьдрах боломж бүрдэж байна.

Иргэдтэй хийсэн Ерөнхий сайдын уулзалтын үеэр УИХ-ын гишүүн О.Содбилэг “Үерийн далангийн хөрөнгийн эх үүсвэрийн талаар Аюулгүй байдал, гадаад бодлогын байнгын хороон дээр ч яригдаж судалж байсан” тухайгаа хэлсэн. Эндээс харвал үерийн далангийн ажилд УИХ-ын гишүүн маань хошуугаа биш хуруугаа хөдөлгөсөн тухайгаа үг хэлэх далимандаа хавчуулаад авна билээ.  

Ерөнхий сайдтай хийх уулзалтад оролцсон иргэд өөрсдийн сонирхсон болон өөрийн эрх ашиг нь зөрчигдсөн хийгээд тулгамдсан асуудлаа тавьж хариулт авлаа.