Тэнгэрт бараан үүл хуримтлагдаж хэзээ мөдгүй бороо шаагих гэж байсан ч Эрдэнт хотын иргэд Амарын талбайг зорин ирсээр. Энэ сарын 24-ний бямба гарагт Амарын талбайд “Юнивишнтэй гэр хороолол” нээлтийн ёслолын ажиллагаа болох тул иргэдийн хувьд бороог нэг их юманд тоогоогүй. Тэр бүү хэл нэг хэсэг ширүүхэн асгарах бороонд ч үл ажран “Юнител” группын Монголд анх удаагаа хэрэгжүүлж байгаа “Юнивишнтэй гэр хороолол” төслийн оролцогч, гэрч болохын тулд Эрдэнэтчүүд төв талбайдаа хуран цугласан юм.

“Юнител” групп Монголд анх удаагаа тэр тусмаа Эрдэнэт хотын гэр хороололд өндөр хурдны интернэт, IPTV, суурин утасны гурвалсан үйлчилгээг нэвтрүүлж байгаа билээ. Энэ ажилд тус группын зүгээс 5 тэрбум төгрөгийн хөрөнгө оруулалт хийснээр Эрдэнэтийн гэр хорооллын иргэд байшин хорооллынхоноос дутахгүй дэлхийн жишигт нийцсэн үйлчилгээг авах боломж бүрдсэн юм. Ингэснээр Эрдэнэтийн гэр хорооллын иргэд хотын соёлд бусдаас түрүүнд нэг алхмаар нэвтрэхийн зэрэгцээ оюуны үнэтэй хувь нэмэр, хөрөнгө оруулалтыг хүртэж байгаа азтай, одтой эрхмүүд юм. “Юнивишнтэй гэр хороолол” нээлтийн ёслолын ажиллагааны үеэр “Юнител” группын Гүйцэтгэх захирал Д.Энхбатаас зарим зүйлийг тодруулсан юм.

-Нийтдээ таван тэрбум төгрөгийн өөрсдийн хөрөнгө оруулалтаар Эрдэнэтийн гэр хороололд гурвалсан үйлчилгээг нэвтрүүлж байгаа танай хамт олонд иргэдийнхээ өмнөөс талархсанаа илэрхийлье. Энэ ажлын зарим нэг онцлогуудаас нэрлэвэл?

-“Юнител” групп, “Юнивишн” компанийн үйл ажиллагааны хүрээнд гэр хороололд өндөр хурдны шилэн кабельд тулгуурласан гурвалсан үйлчилгээг яаж хүргэх вэ гэдэг судалгааг таван жилийн турш манай хамт олон хийсэн. Энэ таван жилийн турш “Юнител” группын инженер, техникийн ажилчид, монгол инженерүүдийн ур ухаан шингэж өнөөдөр Монголд анх удаа Эрдэнэт хотын гэр хороололд гурвалсан үйлчилгээ нэвтэрсэн бодит ажил болж байгаад бид маш их баяртай байна. Энэ ажлыг бүтээн байгуулахад манай группээс таван тэрбум төгрөгийн хөрөнгө оруулалт зарцуулаад байна. Эрдэнэтчүүд та бүхэндээ бид дэвшилтэт технологийг нэвтрүүлэхийн төлөө илүү хичээж ажиллах болно.

-Эрдэнэтийн иргэд хэрхэн хүлээж авч байна вэ?

-Бид энэ ажлынхаа хүрээнд 5600 айл өрхөд нийтдээ 5 тэрбум төгрөгийн хөрөнгө оруулалт хийсэн. Манай байгууллагын зүгээс 14 хоногийн дотор гэр хорооллын иргэдийн дунд судалгаа явуулсан. Энэ хугацаанд 2000 гаруй айл, өрх танай үйлчилгээг авахад бэлэн гэдэг санал, захиалгаа өгөөд байна.

-Та бүхэн яагаад заавал Эрдэнэт хотыг сонгосон юм бэ?

-Тэгэлгүй яахав бидэнд илүү олон сонголт байсан. Дээр нь санаачлагыг бид харсан. Эрдэнэт хотын залуус, Орхон аймгийн Засаг даргын санаачлага, ЗДТГ-ын хамт олны санаачлага манай ажлыг дэмжиж байсан зэрэг нь биднийг Эрдэнэт хотыг сонгоход гол нөлөө үзүүлсэн. Энэ сонголт маш зөв байсан гэдэгт бид огтхон ч эргэлзээгүй. Хоёрдугаарт, Монголын эдийн засгийг олон жил нуруун дээрээ үүрч яваа үйлдвэрийн хотын гэр хорооллын иргэд, айл өрхийн хүүхэд багачуулын гэрэлт  ирээдүйн төлөө Эрдэнэт хотыг дуу нэгтэй сонгосон юм. Тэгээд ч Эрдэнэт бол маш залуу, хөгжиж байгаа манай улсын томоохон хотын нэг. Монгол улсын тулгуур эдийн засгийн бүс нутаг. Ийм залуу, өндөр хөгжилтэй хотын айл өрхийн хөгжил технологид суурилсан байх ёстой гэж бид үзсэн. Мэдээлэл, технологийн салбарт үйл ажиллагаа явуулж байгаа “Юнител” компанийн хувьд хамгийн сүүлийн үеийн дэлхийн шилдэг технологийн хүргэх үндсэн зорилготойгоор Эрдэнэт хотын гэр хорооллыг бид сонгосон.

-Гурвалсан үйлчилгээ нэвтэрснээр ямар үр дүн гарна гэж та бүхэн харж байна вэ?

-Гурвалсан үйлчилгээ нэвтэрснээр үнэхээр тодорхой үр дүн гарна. Гэр хороололд амьдарч байгаа хүүхэд багачуул маань интернэт ашигласнаар мэдээлэлтэй ойр байх болно. Мөн мэдлэг олж авна, цаашлаад сурч боловсрох боломж илүү нээгдэнэ. Илүү хурдтай болно. Дэлхийд түвшний  мэдлэг, боловсролыг эндээс авч ирээдүйд өөрсдийнхөө мэргэжил боловсролыг сонгохын зэрэгцээ ирээдүйгээ бүтээхэд нэг алхмаар ч гэсэн илүү ойрхон боллоо гэж бид харж байна. Бидний хийсэн хөрөнгө оруулалтын үр шимээр Эрдэнэт хотын гэр хорооллын айл өрхүүд гурвалсан үйлчилгээ хүлээж авсан Монголын анхдагчид болж байна.