Эрхэм хүндэт наадамчид аа, Эрдэнэтчүүдээ, ноёд, хатагтай нар аа. Монгол улсын тулгар төрийн 2223, Их Монгол улсын 808, Монголчуудын тусгаар тогтнолоо эрхэмлэн дээдлэх  дээдийн хүсэл эрмэлзлэлийн нэгэн том буухиа болсон Ардын хувьсгалын 93 жилийн ойн баяр, наадмын халуун мэндийг та бүхэнд дэвшүүлье. Монголчууд 20-р зуунд гурван том хувьсгал хийсний хоёр нь “ардын”, “ардчилсан” буюу “ард” хэмээх нэг л язгуур үгээр тодотгосон хувьсгалууд байсан нь угтаа үндэсний ардчилсан хөдөлгөөний үе,  шатууд байжээ. Монгол улс тусгаар тогтнох, Монгол хүн эрх, эрх чөлөөгөө олох нэгэн үзүүрт сэтгэлд хөтлөгдсөн энэхүү түүхэн лут үзэгдлийн түүчээ нь 1911 оны үндэсний эрх чөлөөний хувьсгал байсан юм. Түүхэн утгаараа үндэсний ардчилсан хөдөлгөөн өнөөдөр ч үргэлжилж байгаа бөгөөд монголчууд Монгол улсынхаа тусгаар тогтнол, Монгол хүний эрх, эрх чөлөөний найдвартай баталгаа нь Ардчилал хэмээн үзэж буй нь үүний баталгаа юм. Монголчууд бид төрт ёсны нэн эртний бөгөөд гүн гүнзгий, өргөн дэлгэр уламжлалтай ард түмэн. Төрт ёсны уламжлалын түүх  бол тусгаар монгол улсын эрх чөлөөт монголчуудын түүх байдаг. Эл төрт ёсны нандин уламжлал, цалиг түүхийнхээ цараа хүрээгээр омогшин бахархаж, баясан цэнгэхүйн манлай дээд нь Монгол наадам юм. Наадмаас наадмын хооронд хийсэн бүтээснээ эргэн нэг харж, хийх бүтээхээ саравчлан нэг  хардаг нь монгол заншил  юм. 2012 оны  нутгийн өөрөө удирдах ёсны сонгуулиар Орхон аймагт үнэмлэхүй ялалт байгуулсан ардчилсан хүчнийхэн бид ч наадмаас наадмын хооронд нэгэн үзүүрт сэтгэлээр иргэдийнхээ төлөө зүтгэлээ. Манай иргэд аймгийн ЗДТГ, төрийн захиргаа болон төрийн бус байгууллагууд ч тус, тусынхаа ахуй амьдрал, ажил үйлсийнхээ жолоо цулбуурыг баттайяа атгаж, Эрдэнэт хотынхоо хөгжил цэцэглэлтийн төлөө нэгэн үзүүрт сэтгэлээр зүтгэсний  хүчинд төлөвлөсөн,  санаачилсан ажлууд амжилттай хэрэгжиж байна. Юуны өмнө энэ зун Эрдэнэт хотын хувьд “Их бүтээн байгуулалт”-ын зун болж байна. Гэр хорооллыг дахин төлөвлөх замаар иргэдийг орон сууцжуулах хөтөлбөр хэрэгжиж “Эко”, Евро “эко”,1 “а”, 2 “а” хороолол,  “Төгөл” “Өнөр” хотхоны барилгын ажил хийгдээд явж байна. Шинийг барихаас гадна хуучин орон сууцны байшингуудаа сэлбэн тордож, дээвэр заадасны засварын ажлыг иж бүрнээр нь хийж байна. Байр хоорондын бүх авто замыг зогсоолтой нь хамт өргөтгөн шинэчилж байгаа нь энэ зуны их бүтээн байгуулалтын ажлын өнгийг тодорхойлж, иргэдийн талархлыг зүй ёсоор хүлээж байна. Зөвхөн орон сууцны дээвэр, заадсын их засвар, байр хоорондын замын өргөтгөл шинэчлэл, гэр хорооллын гэрэлтүүлэгт 12 тэрбум 342 сая төгрөгийн хөрөнгө оруулалт хийлээ. Гэр хорооллын айлуудыг  инженерийн шугам сүлжээнд холбох ажлыг намраас Баянцагаан багийн ПДУ-гийн 200 айлаас эхэлнэ. Төрийн үйлчилгээг иргэдэд ил тод, нээлттэй болгох,шууд ардчиллыг хөгжүүлэх чиглэлд ч чанарын том ахиц гарлаа. Манай иргэд, малчид, тариаланчид, аж ахуйн нэгжүүд тулгар төрийн 2223, Их Монгол улсын 808, Ардын хувьсгалын 93 жилийн ойг ажил хөдөлмөрийн арвин амжилтаар угтаж байгааг аймгийн төр, захиргааны байгууллага өндөр үнэлж байна. Оны эхний хагас жилийн байдлаар аж үйлдвэрийн салбарт 523, 9  тэрбум төгрөгийн бүтээгдэхүүн үйлдвэрлэж,  698, 8    тэрбум төгрөг буюу  395,3 сая ам. долларын гадаад худалдааны бараа эргэлт хийсэн байна.  Манай газар тариаланчид газар тариалангийн үйлдвэрлэлийн эрчимт хөгжлийн гол үзүүлэлт болсон  нэг га-гаас авах ургацаар улсдаа тэргүүлдэг сайхан уламжлал тогтоож, малчид мал сүргээ сул асгасан сувд шиг өсгөлөө. Эрдэнэт хотын зам харгуй засагдан сайжирч, гэрэлтүүлэг  чимэглэл  гийн тодорч, зүлэг мод зүгшрэн ургаж, иргэдийн ажиллаж, амьдрах орчин нөхцөл илтэд өнгө засаж, ая тух орж байгаа  нь  иргэд та бүхний хичээл зүтгэлийн үр шим  юм. Эрдэнэт бол өнгөрсөн, өнөө, ирээдүй гэсэн гурван цагийн орчилд, найрамдалт харилцааны шүтэн барилдлагад сүндэрлэн босож, зуунаар овоглосон лут том бүтээн байгуулалт билээ.  Энэхүү эрин зууны манлай бүтээн байгуулалтын эзэд, анхдагчид, үргэлжлүүлэгчид, залгамжлагчид болох Эрдэнэтчүүдийн эх оронч, хөдөлмөрч нандин уламжлал бол та бидний хамгийн үнэт өв үнэт, үнэт хөрөнгө юм. Чухам энэ өвийг арвижуулан баяжуулах нь  Эрдэнэтийн ирээдүйн баталгаа юм гэдгийг наадмын  налгар сайхан өдрүүдэд хотол олон маань хоногшоон сэтгэлдээ болгоох нь лавтай. Хүчит бөх тань бяртай, хүлэг морьд тань хурдан, тавьсан сум тань эрчтэй байх болтугай. Орхон аймгийн Засаг дарга Г. Зоригт