Хүүхдийн мөнгийн бүх хүүхдэд өгнө гээд яриад эхлэх чинь, сонгууль болох гэж байгаа юм уу даа, янз нь. УИХ дахь МАН-ын Бүлгийнхэн төдийгүй нэр бүхий зарим гишүүн “Төсөвт тодотгол хийж бүх хүүхдэд алагчлалгүй хүүхдийн мөнгийг олгох хэрэгтэй” гэж ирээд нааж байна, цаана чинь. МАН-ынхан хүүхдэд тийм хайртай болчихсон юм уу. Өнгөрсөн оны эцсээр улсын төсөв хэлэлцэж байх үед “Бүх хүүхдэд хүүхдийн мөнгө олгохгүй. Нийт хүүхдийн 91 хувьд нь олгоно” гэж ирээд л хүүхдээс мөнгө харамлаж суусан эрхмүүд өнөөдөр ичих ч үгүй “Хүүхдийн мөнгийг бүх хүүхдэд” гэж яриад л, арай л лоозон барьж жагссангүй.

Амьдрал дээр өнөөх хүүхдийн мөнгө олгохгүй 9 хувьд нь мань мэтийн хүүхдээс эхлээд “Эрдэнэт үйлдвэр”-ийн жирийн нэгэн уурхайчны хүүхдүүд, хөл дүүжлэх муухан ч гэсэн нэг унаатай, нийтийн байр саванд амьдардаг залуу гэр бүлүүд, ипотекийн зээлээр нэг өрөө байр авсан өрх толгойлсон эмэгтэйн  хоёр охин хүүхдийн мөнгөнөөс хасагдсан. Одоо эргээд сонгууль дөхсөн болохоор санал гуйх гээд “хүүхдийн мөнгийг бүх хүүхдэд” гээд уран донгодоод эхэлчихэж.

Тэдэнд ичих нүүр байхгүй л дээ. Сонгогчийн саналыг авахын тулд уян сэтгэлтэн болохоос гадна, “хүүхдийн мөнгийг ялгаваргүй олго” гээд уран нугараач болж чадах л этгээдүүд. Зарим нэг дарга нар төсөвийн дарамт буурсан, уул уурхайн орлого нэмэгдсэн, нүүрсээ сайн зарсан учраас бүх хүүхдэд хүүхдийн мөнгийг олгох боломжтой боллоо хэмээн албаны, жижүүрийн үг унагаж байгаа ч үнэндээ хумсаа нуусан муур шиг л зан гаргасан.

Түүх заримдаа гэнэт давтагддаг аж. Хэдхэн жилийн өмнө Хөдөлмөр, халамжийн яамаар дамжуулан судалгаа хийгээд хүүхдийн мөнгийг бас л хасч байсан. “Танайх угаалгын машинтай юм байна, та гаднаа машинтай юм байна, гэрэл цахилгааны найдвартай эх үүсвэрт холбогдсон байна шүү, танайх” гэж хэлээд олон зуун айл, өрхийг хүүхдийн мөнгө 20 мянган төгрөг байхад хасч байлаа. Тэгснээ хоёр, нэг жилийн дараа бүх хүүхдэд олгоод л...

Одоо ард түмэн бүү хэл, хүүхдийн мөнгөнөөс хасагдсан багачуул хүртэл та бүхний наад тоглоомонд итгэхээ больж. Хүүхдийн мөнгийг халамж болгож манийгаа мурьж, хүүхдийг минь ялгаварлачихаад одоо надаас сонгуулийн санал авна гэвэл ёстой нөгөө “дунд хуруу” гэе.

МАН-ынхан хүүхдэд тийм хайртай байсан гэж үү.    

            Гэрэл зургийн “MGLNEWS”mn-ээс ашиглав.