Орхон аймгийн 2022 оны аварга тариаланчаар Ганбатын Баярдалай шалгарчээ. Жаргалантчууд энэ мэдээг сонсоод “Аваргын хүү аварга бололгүй яахав. Манай Баярдалай Гавьяат тариаланч ээжийнхээ магнайг тэнийлгэлээ” хэмээн бахархаж байлаа. Манай аймгаас бар жилд аймгийн аварга тариаланч 4 төрсний нэг нь Улсын аварга тариаланч Л.Ганбат, 2022 оны 7 дугаар сард Монгол улсын Ерөнхийлөгч У.Хүрэлсүхээс Монгол улсын Гавьяат Тариаланч цол тэмдэгээр энгэрээ мялаасан н.Баясгаланцэцэг нарын хүү Баярдалай байлаа.

Тариаланч аав, ээжийнхээ мэргэжлийг өвлөн газар тариа ногоотой амьдралаа холбосон Г.Баярдалай “Аймгийн аварга тариаланч болсондоо баяртай байна. Энэ эрхэм шагналыг хүртсэндээ ээжийнхээ ачыг бага ч гэсэн хариулсан болов уу гэж санаж байна. Хар багаасаа л аав, ээжийгээ дагаж ногооны талбай дээр өсөж өндийсөн миний хувьд ногоочин хүний хөдөлмөрийг дэндүү сайн мэднэ.Өнөөдөр би өөрөө аймгийн аварга тариаланч болсон гэхээсээ илүү аав, ээжээрээ бахархаж байна. Манай Жаргалант сумаас Улсын аварга тариаланч цолтон 16 төрсөн байдаг. Эдгээрийн 4 нь манай аавын гэрээс тодорсон.

Ээж минь Улсын аварга тариаланчаар 3 удаа шалгарч өнгөсөн зун ногоочин эмэгтэйчүүдийн дундаас анх удаагаа Монгол улсын Гавьяат тариаланч цол тэмдгээр энгэрээ мялаасан. Аав минь Улсын аварга тариаланч Ганбат гэж хүн байгаа. Манай аавыг жаргалантчууд андахгүй. Ийм мундаг хөдөлмөрч, алдартай хүмүүсийн үр  нь болж төрсөндөө тэднийхээ дагаж ногоочин болсондоо баяртай байна” гэлээ.