(Хэвлэлийн өдөрт зориулсан хэвлэлийнхний тухай мэдээллүүд) 1993.05.03. Энэ өдрөөс дэлхий нийт Хэвлэлийн эрх чөлөөний өдрийг албан ёсоор тэмдэглэж эхэлсэн. НҮБ-ын Ерөнхий Ассамблей тавдугаар сарын 3-ныг Дэлхийн хэвлэлийн эрх чөлөөний өдөр болгох тусгай тогтоол гаргажээ. Жил бүр дэлхийн аль нэг улсыг сонгон авч, Дэлхийн хэвлэлийн эрх чөлөөний өдрийн “нийслэл” болгодог. Энэ жилийн тухайд Индонезийн нийслэл Жакарта хотод тавдугаар сарын 1-4-нд албан ёсны арга хэмжээнүүдийг зохион байгуулж байна.  2017 оны хувьд Дэлхийн хэвлэлийн эрх чөлөөний өдрийг “Эгзэгтэй цаг үед эргэцүүлэн тунгаах ухаанаар хандах нь: Тайван, шударга, бүхнийг хамарсан нийгмийг хөгжүүлэхэд хэвлэл мэдээллийн оруулах үүрэг” сэдвийн хүрээнд тэмдэглэж байна. --- СОНИРХОЛТОЙ --- Британид сонины тоймч нарын 47 хувь нь Оксбрижийн сургуулийг төгссөн байдаг. АНУ-д насанд хүрсэн 10 хүн тутмын 7 нь долоо хоног бүр хэвлэмэл сонин, эсвэл цахим хэлбэрээр сонин уншдаг. New York Times сонины цахим хуудасны онцлох мэдээллийн хэсэгт хагас өдөр байршсан мэдээг 8 сая хүн уншдаг. Хэвлэлээр “Дэлхийн хамгийн муу теннисчин” гэж цоллуулсан Британийн теннисчин өөрт нь ийм ичгэвтэр хоч оноосон сонин, хэвлэл, мэдээллийн сайтуудын эсрэг шүүхэд гомдол гаргажээ. Тэр шүүх танхимд бүх хэрэг дээр ялсан бөгөөд хэвлэл, мэдээллийн байгууллагуудын уучлал хүссэн нийтлэлийг бүгдийг нь өөрийн албан ёсны цахим хуудсанд “Уучлал ба залруулга” гэсэн булан нээж, түүндээ байршуулсан байдаг. MSNBC-гийн мэдээний хөтлөгч Мика Брзезинский Үндэсний телевизээр Парис Хилтон шоронгоос суллагдсан тухай мэдээ уншихаас татгалзаж, оронд нь Иракийн дайны мэдээ уншиж байв. Продюсер Парис Хилтоны тухай мэдээг уншихыг шаардахад тэр шууд эфирийн үеэр мэдээ бичсэн цаасыг шатааж орхижээ. Цаазын ял сонссон этгээдийн ялыг гүйцэтгэхээс 50 цагийн өмнө хоёр дадлагжигч сэтгүүлч гэм буруугүйг нь баталж, амийг нь аварч байжээ. Цуврал алуурчны тухай мэдээ материал, түүх бэлтгэн нийтэлдэг байсан сэтгүүлч өөрөө цуврал алуурчин байжээ. 20 гаруй жилийн гэмт хэргийн сэтгүүлчээр ажилласан, Югославын сэтгүүлч Владо Танески жигшүүрт хүн амины хэргийн тухай цуврал нийтлэл бэлтгэхдээ олон нийтэд мэдээлэгдээгүй баримт, фактуудыг дурддаг байсан нь цагдаагийнханд сэжиг төрүүлжээ. Энэ дагуу шалгаад 2008 онд түүнийг илрүүлсэн байна. Британийн телевизийн нэвтрүүлэгч, сэтгүүлч Жеймс Даниэл Мэй дэлхийн хамгийн баян сэтгүүлч гэгддэг. Алдарт “Top Gear” нэвтрүүлгийн хөтлөгч хувьдаа “W. Chump Sons” гэх продакшнтай, “The Daily Telegraph” сонинд долоо хоног тутмын булан хөтөлдөг. Түүний цэвэр хөрөнгө 15 сая ам.доллараар үнэлэгдэнэ. NBC телевизийн хөтлөгч Мегин Келлийг олон нийтийн саналаар 2016 оны хамгийн царайлаг бөгөөд тачаангуй мэдээний хөтлөгчөөр нэрлэжээ. 2014-2017 онд Fox News-т ажиллаж байсан тэрбээр өнгөрсөн нэгдүгээр сараас NBC News-т ажиллах болжээ. 2016 онд дэлхийн хэмжээнд 219 сэтгүүлч ямар нэг байдлаар ял сонсчээ. 2016 онд дэлхийн хэмжээнд 74 сэтгүүлч ажлаа хийж яваад амиа алдсан байна. Тэдний 19 нь Сирид амь үрэгджээ. Тиймээс дайны хөлд нэрвэгдээд буй Сири улсыг сэтгүүлчдэд хамгийн халтай орноор нэрлэсэн байна. Сэтгүүлчдийн тухай өгүүлэх олон кино байдаг. Хамгийн алдартай нь 1976 онд дэлгэцнээ гарсан “All the Presidents’ Men” кино юм. Эх сурвалж: News.mn [sgmb id="1"]