“Эрдэнэт үйлдвэр” ХХК-ийн ерөнхий захирал Х.Бадамсүрэн энэ хаврын “од” болж буй бололтой. Түүний хувьд энхрий хайрт намынхаа нэр хүнд, Ерөнхийлөгчийн сонгуульд өрсөлдөхөөр зэхэж байгаа намын дарга М.Энхболдынхоо нэр хүндийг гэрлийн хурдаар унагаж байгаа бололтой. Ямар сайндаа л МАН-ынхны дунд “Бадамсүрэн, Чойжилсүрэн хоёр ч энэ сонгуулийн дүнг олон нийтийн дунд тавьчихлаа” хэмээн бухимдаж байхав. Х.Бадамсүрэн захирал ч гэсэн юм үзсэн, нүд тайлсан хүн шиг байсангүй. Цагтаа “Монголросцветмет” нэгдлийн ерөнхий захирлын суудлаас эхлээд дэд сайдын сэнтийд хүртэл тухалж байсан, эрх ямбыг хүртэж үзсэн л баймаар. Гэтэл тэгэхээс тэгэх гэсэн юм шиг амьдрах байрандаа 24 сая төгрөгөөр засвар хийлгээд, 180 гаруй сая төгрөгөөр тавилга аваад л. Дээр нь “Эрдэнэт үйлдвэр” ХХК-ийн ерөнхий захиралд унах машин байгаагүй гэж үү. Заавал цоо шинэ, 2016 оны загварын “Лексус 570Х” авч унах шаардлага байсан уу. Миний мэдэхийн өмнөх захирал Ц.Даваацэрэн дээрхээс дутахгүй том жийптэй, дээр нь Эрдэнэтэд байхгүй “Мерседес бенз”-тэй байсан. Энэ машинуудыг тэгвэл ажлаа өгсөн захирал асан Ц.Даваацэрэн аваад явчихсан уу гэх асуулт гарч байна. Өнөөдөр Х.Бадамсүрэн захирлын талаар гарч байгаа энэ мэдээллийг хэн захиалаад, хэн баримтыг нь олж өгөөд байгаа нь ч уншигчдад дэндүү ойлгомжтой. Явж, явж төрийн өмчийн 51, хувийн хэвшлийн 49 хувийнхны хооронд болж байгаа улсын хэмжээнд бол “цусгүй дайн”, Эрдэнэтийн хонхорт бол “Орон нутгийн чанартай мөргөлдөөн”. Саяхан төвийн зарим нэг хэвлэл мэдээллийн хэрэгслээр “Дэлхийн лидерүүд ямар цалинтай вэ” гэдэг мэдээлэл гарсан. Эндээс “Эрдэнэт үйлдвэр” ХХК-ийн ерөнхий захирал Х.Бадамсүрэн дэлхийн зарим нэг орны лидерүүдээс ч илүү өндөр цалин хөлс авдаг юм байна гэдгийг харьцуулж үзсэн юм. Магадгүй Х.Бадамсүрэнгийн хувьд МАН-ын дарга М.Энхболдын өмнө ч тэр, үйлдвэрийн ТУЗ-ийнхний өмнө ч тэр “Би сардаа 10 мянган ам.долларын цалин л авна” гэж хошуу цорвойлгоогүй болов уу. Харин хэвлэлээр гарч байгаа мэдээллээс харвал Төрийн өмчийн бодлого, зохицуулалтын газрын дарга Ц.Ням-Осор л том толгойлон ерөнхий захиралд сарын 10 мянган ам.доллар буюу 24.9 сая төгрөгийн цалин өгөх санал гарган нэг сумаар хоёр туулай буудах гэсэн бололтой. Ингээд Х.Бадамсүрэн захирлын сар, жилдээ авах цалинг нь дэлхийн зарим нэг орны лидерүүдийн цалинтай жишиж үзлээ. Х.Бадамсүрэн захирал сардаа 10 мянган ам.доллар жилдээ 120 мянган ам.долларын цалин авна. Тэгвэл дэлхийн хамгийн хүчирхэг гүрний нэг АНУ-ын тэргүүн Дональд Трамп сард ердөө нэг ам.долларын цалин аваад ард түмнийхээ төлөө ажиллах тангараг өргөсөн. Эндээс харвал Х.Бадамсүрэн захирал АНУ-ын Ерөнхийлөгчөөс 120 мянга дахин илүү цалинтай. АНУ-ын Ерөнхийлөгч ДОНАЛД ТРАМП $1 Дэлхийн хамгийн их хүн амтай, хүчирхэг гүрэн манай өмнөд хөршийн дарга Си Жиньпин жилдээ 20.6 мянган ам.долларын цалин авдаг аж. Тэгвэл Х.Бадамсүрэн захирал БНХАУ-ын даргаас зургаа дахин их цалинг жилдээ авах нь ээ. БНХАУ-ын дарга СИ ЖИНЬПИН $20,600 Цөмийн зэвсэгтэй дэлхийн их гүрнүүдийн нэг Энэтхэгийн Ерөнхий сайд Нарендра Моди жилдээ 28.8 мянган ам.долларын цалин авдаг байна. Түүний хувьд Монгол улсын төрийн 100 хувийн өмчит аж ахуйн нэгж “Эрдэнэт үйлдвэр” ХХК-ийн захирал Х.Бадамсүрэнгээс 1 дахин бага цалин авдаг болох нь. Энэтхэгийн Ерөнхий сайд НАРЕНДРА МОДИ $28,800 Италийн ерөнхий сайд Маттео Ренци гэж эрхэм байх. Тэрбээр жилдээ 120 мянган ам.долларын цалин авдаг. Х.Бадамсүрэн захирлын жилийн цалин түүнийхтэй дүйж байна. Италийн Ерөнхий сайд МАТТЕО РЕНЦИ $120,000 Хамгийн сүүлд манай улсын Ерөнхийлөгч Ц.Элбэгдоржийн цалинг Х.Бадамсүрэн захирлын ажлын хөлстэй зэрэгцүүлж үзлээ. Ерөнхийлөгч Ц.Элбэгдорж ямар ч байсан цалингаа төгрөгөөр авдаг аж. Түүний хувьд жилдээ 51 сая 133 мянга 500 төгөргийн цалин авна. Нэг сард дунджаар 4 сая 261 мянга 125 төгрөг гэсэн үг. Монголбанкны өнөөгийн албан ёсны ханшаар тооцож үзвэл манай улсын Ерөнхийлөгчийн цалин жилдээ 21.2 мянган ам.доллар болж байна. Үүнийг Х.Бадамсүрэн захирлын цалинтай харьцуулбал манай улсын төрийн тэргүүн түүнээс 5.6 дахин бага цалин авдаг юм байна.     Монгол Улсын Ерөнхийлөгч Ц.ЭЛБЭГДОРЖ $21,262 Хамгийн сонирхолтой нь Д.Трамп, Си Жиньпин, Нарендра Моди, Маттео Ренци нар бүгд улс орныхоо төрийн тэргүүнүүд. Тэд улс орноо удирдсаныхаа төлөө цалин авдаг. Харин Х.Бадамсүрэн захирал улсынхаа төрийн өмчит үйлдвэрийн газрыг захирсаныхаа төлөө сардаа 10 мянга, жилдээ 120 мянган ам.долларын цалин авах юм байна. [sgmb id="1"]