“Эрдэнэт үйлдвэр”-ийн Ерөнхий захирлын цалин сарын 10 мянган ам.доллар буюу 25 сая төгрөг байна гэсэн мэдээллээр монголчууд хэдэн өдөр амьсгалж байна. Бүр зарим нь атаархаж байна, нэг хэсэг нь ямар их мөнгө авдаг нөхөр вэ гээд “боож үхэхэд бор шидэмс” гэдэгтээ туллаа. Ерөнхий захирлын цалингийн хажуугаар тус үйлдвэрийн ТУЗ-ийн дарга, гишүүдийн цалин, ахуй хангамжийн тухай барин тавим мэдээллүүд хөвөрсөөр. Дээр нь орлогч захирлуудын цалин гээд тоочвол монголчуудын хувьд үйлдвэрийн захирлын цалин тойрсон ярианы сэдэв мөддөө л хуучрахгүй нь. Юун нөгөө улсаараа нийлж байгаад Олон улсын Валютын сангийн хөтөлбөрт хамрагдаж хэдэн тэрбум ам.доллар хөнгөлөлттэй нөхцлөөр авч эдийн засгаа сайжруулах нь ГОК-ын Ерөнхий захирал, ТУЗ-ийн дарга, гишүүд, орлогч захирлуудын цалин, ахуй хангамж тойрсон сэдвийн дэргэд үнэндээ юу ч биш болж орхилоо. Энэ сарын 5-нд Төрийн өмчийн бодлого, зохицуулалтын газрын дарга Ц.Ням-Осор үүсээд байгаа нөхцөл байдалтай холбогдуулан мэдээлэл хийсэн. Энэ үеэрээ “Өмнө нь үйлдвэрийн нэгдүгээр орлогч орос нөхрийн цалин, ахуй хангамжийн дагуу оруулж ирсэн 13 заалтыг миний хувьд хянаж үзээд дөрвийг нь байхад болно гэж харж байна. Төрийн өмчит аж ахуйн нэгжүүдийн удирдлагуудын цалинг 40-60 хувиар бууруулах Засгийн газрын үүрэг даалгаврын дагуу ингэж харж байгаа. Ерөнхий захирлын цалин сарын 10 мянган ам.доллар буюу 25 орчим сая төгрөг байна гэдэг саналыг ТУЗ-д оруулж байгаа. Зөвхөн саналын хэмжээнд яваа. Шийдэх эрх нь ТУЗ-ынх” гэж мэдэгдсэн. Мөн үүний зэрэгцээ Ерөнхий захирлын цалин тойрсон сэдвийг олны анхаарлаас холдуулах гэсэн үү сэтгүүлчийн асуултад хариулахдаа “Төрийн мөнгөөр машин худалдан авахгүй байх тухай Засгийн газрын тогтоолын хэрэгжилтийг хянаж байгаа. Саяхан Эрдэнэтээс шинэ машин худалдаж авсан асуудал орж ирсэн. Шалгаж байгаа” гэж олон нийтэд дуулгалаа.                  Энэ бүхнээс харвал өнөөдөр нэг талдаа “Эрдэнэт үйлдвэр”-ийн Ерөнхий захирлын цалин хэд байх, ТУЗ-ийн дарга, гишүүдийн цалин, ахуй хангамж ямар байх нь чухал уу. Эсвэл Засгийн газрын тогтоол зөрчдөг, алба аминыхаа хэрэгцээнд зориулж 300 сая төгрөгөөр “Лексус 570” машин худалдан авдаг том толгойтой даргад хариуцлага тооцолгүй харин ч түүнд шагнал болгож сар бүр 25 сая төгрөгийн цалин олгох тухай гурван саяулаа хэлэлцүүлэг зохион байгуулах уу. Ямар ч байсан Х.Бадамсүрэн захирал “Таван богд” группээс 300 сая төгрөгөөр “Лексус 570Х” загварын шинэ машин авч унасныг Төрийн өмчийн бодлого, зохицуулалтын газрын дарга Ц.Ням-Осор хүлээн зөвшөөрсөн. Үүнд нь хэн хэрхэн хариуцлага тооцох, арга хэмжээ авах эзэн хаана байгаа нь иргэдэд, тэр дундаа үйлдвэрийн жирийн нэгэн уурхайчинд тэр бүр харагдахгүй байна. Гүйцэтгэх захирлын хувьд Өмчлөгчтэйгээ цалин хөлснийхөө асуудлыг шийдээгүй байж Засгийн газрын тогтоолыг зөрчин 300 сая төгрөгөөр автомашин худалдан авч байгаа нь Х.Бадамсүрэнг Монголын улс төр, бизнесийн томоохон бүлэглэлийн төлөөлөгч, эрх баригч намын даргын хүн гэдгийг хэлээд байна. Түүний хувьд дураараа, эрх мэдлээ хэтрүүлэн дуртай машинаа өнгө мөнгийг нь шилж байгаад авч унаж байгаа үйлдэл өөрийг нь ингэж уншигдахад хүргээд байна. Удахгүй Ерөнхийлөгчийн сонгууль болно. Уурхайчид, тэр дундаа Эрдэнэтийн уурхайчид удмаараа шударга үйлд дуртай, худал хуурмаг зүйлийг тэвчдэггүй. Хүн бүхэн тэгш эрхтэй юм бол Засгийн газрын тогтоол зөрчдөг Х.Бадамсүрэн захирлын 300 сая төгрөгийн үнэтэй машин худалдан авсан үйлдэлд хэн нэгэн хариуцлага тооцох ёстой гэдгийг харж, хүлээж байгаа. Сонгуулийн дүнд нөлөө үзүүлж болох шийдвэрийг эрх баригчид гаргах уу, машин авсаныг нь урамшуулаад толгойг нь илэх үү гэдгийг харах л үлдлээ. [sgmb id="1"]