Эрдэнэт үйлдвэр ХХК-ийн Төлөөлөн удирдах зөвлөл Эрдэнэт хотод хуралдаж Ерөнхий захирал Х.Бадамсүрэнгийн орлогч захирлуудыг шинээр томиллоо. Үйлдвэрийн Ерөнхий захирал ч шинэ багийнхандаа сэтгэл хангалуун байгаа нь ТУЗ-д хандаж хэлсэн “...ачааны хүндийг үүрэлцэх мэргэжлийн өндөр ур чадвартай, дадлага туршлагатай хүмүүсийг томилж өгсөн Төлөөлөн удирдах зөвлөлийн дарга, гишүүдэд талархал илэрхийлье. Мэргэжлийн Засгийн газар мэргэжлийн үүднээс хандлаа. Үйлдвэрийн үйл ажиллагааг хэвийн жигд явуулах, үр ашгийг нэмэгдүүлэх, хөгжил дэвшил өөд хөтлөх бүтэц, томилгоо боллоо...” гэх үгнээс нь илт байв. Тэгвэл “Эрдэнэт” үйлдвэрийн шинэ орлогч захирлуудыг шинжье. Шинэ бүтцээр Х.Бадамсүрэн захирал 5 орлогчтой ажиллах юм байна. Эрдэнэт үйлдвэр ХХК-ийн Тэргүүн дэд захирал Б.Шинэбаатарыг ажлаас нь чөлөөлж үүрэг гүйцэтгэгч нэрээр түр үлдээсэн нь “оньсого” таахад хүргэв. Гэсэн ч хуучнаар 49 хувийн талыг төлөөлөх энэ эрхэм нэг л өдөр нутаг буцах нь хэн бүхэнд тодорхой. Харин Үйлдвэрлэл эрхэлсэн орлогчоор Баяжуулах фабрикийн дарга асан Д.Эрдэнэцогтыг, Хөгжил, их барилгын асуудал эрхэлсэн орлогчоор Үйлдвэр техникийн газрын дарга асан П.Батболорыг томилсон нь ёстой л “мэргэжлийн” гэх тодотголд нийцсэн. Нэг нь уул уурхайн ашиглалтын инженер, нөгөө нь баяжуулалтын технологич мэргэжилтэй, “Эрдэнэт” үйлдвэрийн унаган кадрууд. Харин Эдийн засаг, санхүү эрхэлсэн орлогчоор Орхон аймгийн Засаг дарга асан Д.Дэлгэрбаярыг томилсонд Булган хангайчууд баяртай байгаа нь мэдээж. Монгол улсын мэргэшсэн нягтлан бологч түүнийг Орхон аймгийн Нийгмийн даатгалын хэлтсийн ажлыг шинэ шатанд гаргасан гавьяатай эрхэм гэж үзэх хүмүүс цөөнгүй. Тэгвэл өчигдөр Эрдэнэт үйлдвэр ХХК-ийн ТУЗ хуралдаж, Нийгмийн асуудал эрхэлсэн орлогчоор “Симба” группын захирал, Тариалан эрхлэлтийг дэмжих сангийн Тэргүүн асан Ц.Батсайханыг томилжээ. Түүнийг Монголын улс төр, бизнесийнхэн төдийгүй урлаг соёл, спортынхон андахгүй. Атрын III аяны хүрээнд эхлүүлсэн ажил нь хэл ам дагуулж байсан ч эцэстээ үр шимийг нь хүртсэн газар тариалан эрхлэгчдийн өмгөөлөл дэмжлэгийн ачаар харин ч баатар болох дөхсөн. Ц.Батсайханы дүү Ц.Бат-Энх өмнө нь МАН засгийн эрх барьж байх үед “Эрдэнэт” үйлдвэрийн Хөгжлийн асуудал хариуцсан орлогч захирлаар ажиллаж байсан. Дэлхийн шилдэг аж ахуйн нэгж гэх сүржин тодотголтой энэ үйлдвэрийг хөгжүүлэхэд бодлогын түвшинд сайн ажилласан хэмээн мэргэжилтнүүд дүүг нь дүгнэдэг. Ахаас нь түүнээс илүүг хүлээх нь зүйн хэрэг. Тэгэхээр Эрдэнэтчүүд бидний хувьд “битүү морь” Ц.Батсайхан захирлыг хувьдаа үйлдвэр сайн мэдэх мэргэжлийн зөвлөхтэй гэж ойлгож болох юм. Ямартай ч “Эрдэнэт” үйлдвэр хэмээх их айлыг толгойлох Х.Бадамсүрэнгийн баг ийнхүү бүрдлээ. Тэд “мэргэжлийн” түвшинд хэрхэн ажиллахыг олон түмэн харах л үлдлээ дээ. Б.ЖАРГАЛ [sgmb id="1"]