Орхон аймагт мэргэжлийн сэтгэл зүйчдээс бүрдсэн “Бодь шид” сэтгэл зүйн төв, “Ариун хэлхээ”, “Үгийн хүч” ТББ-ууд ажиллаж байна. Дээрх байгууллагад хамрагддаг сэтгэл зүйчид Орхон аймгийн Сэтгэл зүйчдийн холбоог байгуулсан байна. Тус холбооны тэргүүнээр “Бодь шид” сэтгэл зүйн төвийн сэтгэл судлаач Б.Уламбаяр сонгогдож, Удирдах зөвлөлийг мэргэжлийн сэтгэл зүйч, судлаачдаас бүрдсэн долоон хүний бүрэлдэхүүнтэй байгуулжээ. Удирдах зөвлөлийн гишүүнээр “Бодь шид” сэтгэл судлалын төвийн сэтгэл зүйч Г.Баярмаа, Б.Бямбасүрэн, “Ариун хэлхээ” ТББ-ын сэтгэл зүйч Э.Бямбасүрэн зэрэг мэргэжлийн хүмүүсээс гадна хамтран ажиллагч “Медипас” эмнэлгийн ажилтан, сэтгэл судлаач Л.Ариунсанаа, Дэлхийн зөн ОУБ-ын ажилтан М.Мөнх-Эрдэнэ, “Үгийн хүч” ТББ-ын гэр бүл судлаач Д.Энхцолмон нар багтсан байна. Өнөө үед нийгэмд үйлчлэх сэтгэл зүйчдийн оролцоо, шаардлага, хэрэгцээ нэмэгдэж байна. Хувь хүний хөгжил, гэр бүлийн бат бэх байдал, хамт олон байгууллагын хүрээн дэх харилцааны асуудалд сэтгэл зүйчдийн үүрэг зайлшгүй хэрэгцээтэй байгаа юм. Орхон аймгийн хөгжлийн хөтөлбөрт хувь хүний хөгжилд анхаарах үүднээс цогц бодлого төлөвлөсөн. Уг төлөвлөгөөг хэрэгжүүлэхэд сэтгэл зүйчдийн оролцоо зайлшгүй хэрэгтэй байна. Сүүлийн үед сэтгэл судлалын боловсролгүй, мэргэжлийн бус хүмүүс гэр бүл, хүүхдэд зөвлөгөө өгч, лекц унших зэргээр мэргэжлийн ёс зүй зөрчиж байгаад сэтгэл судлаачид эмзэглэн ярьж байна. Сэтгэл зүйчдийн холбоо аймгийн ЗДТГ-ын дэмжлэгтэй нийгэмд үйлчлэх үүргээ биелүүлэх зорилгоор хөтөлбөр боловсруулж, нийгмийн сэтгэл зүйд чиглэсэн олон ажил хийхээр төлөвлөжээ. [sgmb id="1"]