Улстөрч Санжаасүрэнгийн Зориг агсаны амь насыг хөнөөсөн хэрэгт яллагдаад байгаа Орхон аймгийн иргэн Б.Содномдаржаа, Т.Чимгээ нарын ар гэрийнхэн бямба гаригийн 12 цагт “Уурхайчин” соёлын ордны урд талбай дээр ирж, үгээ хэллээ. Баян-Өндөр сумын Засаг дарга захирамж гарган, малын гоц халдварт цэцэг өвчин гарсантай холбогдуулан жагсаал, цуглаан зохион байгуулахыг хориглосон. Иймд Б.Содномдаржаа, Т.Чимгээ нарын ар гэрийнхэний цуглаан зохион байгуулах хүсэлтийг зөвшөөрөөгүй байна. Харин жагсаал, цуглаан зохион байгуулахгүй, уулзалт хийж болно гэж зөвшөөрсний дагуу ар гэрийнхэн нь санал бодлоо илэрхийллээ. Энэ уулзалтанд Б.Содномдаржаагийн аав ээж, ах дүү нар, Т.Чимгээгийн ээж болон 100 орчим иргэн ирсэн байлаа. Ирсэн хүмүүс гартаа “Б.Содномдаржаа, Т.Чимгээ нарыг хэлмэгдүүлэхээ зогсоо”, “Давж заалдах шатны шүүх хурлыг нээлттэй хийхийг шаардаж байна” гэж бичсэн самбар барьсан байв. Энд ирсэн хүмүүсийн уур амьсгалаас ажиглахад, хууль цаазын эрх мэдлээс айж эмээлгүй үгээ хэлж, шүүмжилж байсан юм. Төвийн хэвлэл мэдээллийн хэрэгслээр мэдээлж байсан “С.Зоригийн хэргийн талаар шинэ баримт дэлгэнэ” гэсэн яриа, мэдээллийг энэ үеэр хийгээгүй. Хүмүүс үгээ хэлж, Улсын дээд шүүхэд явуулах Өргөх бичигт иргэдээс гарын үсэг цуглуулах ажиллагаа болсон. Уг уулзалт цаг орчим үргэлжлээд тарсан байна. [sgmb id="1"]