Монгол улсын Төрийн албаны зөвлөлийнхөн манай аймагт ажиллаж “Төрийн үйлчилгээ-ололт туршлага” сэдэвт сургалт зохион байгуулсан билээ. Энэ үеэр ТАЗ-ийн гишүүн Монгол улсын Ерөнхийлөгчийн Тамгын газрын дэд дарга Б.Нэргүй “Үндэсний аюулгүй байдал түүний асуудлууд” сэдвээр сонирхолтой илтгэл тавьсан юм. Жирийн иргэд, төрийн захиргаа болон төрийн үйлчилгээний ажилтнуудын хувьд Үндэсний аюулгүй байдал гэхлээр түүнийг хангах, хамгаалах чиг үүрэг бүхий төрийн тусгай албад байдаг. Тэдний, тэдэнтэй холбоотой асуудал учраас бидэнд хамааралгүй гэж бодож ирсэн бол Б.Нэргүй даргын илтгэлээс харах юм бол Монгол үндэсний аюулгүй байдал, түүний үзэл баримтлал зэрэг нь бидний алхам тутамд хамаарч байдаг, монгол хүн бүрийн санаж сэрж байх тулгамдсан асуудал гэдгийг сургалтад оролцогчид ойлгож мэдэж авсан юм. Тэрбээр энэ үеэрээ “Томчууд та бүхэн бага насны хүүхдүүддээ орой бүр монгол үлгэр ярьж, уншиж өгч байгаач ээ. Энэ бол Монголын тусгаар тогтнолтой шууд хамааралтай. Өнөөдөр ихэнх айл өрх Солонгос сериал үзэж байна. Түүнийг үзсэн хүүхэд том болоод монгол ч биш, солонгос ч биш хүн болно. Монгол ахуй, монгол сэтгэлгээг тэр хэвээр нь хойч үедээ үлдээх нь та бидний хүлээсэн үүрэг гэдгийг томчууд ухамсарлах хэрэгтэй байна. Өнөөдөр шашин шүтэх эрхийг хуулиар хориглоогүй. Тэгвэл Орхон аймгийн иргэдийн дунд Амин гэж хэлээд хоолоо иддэг хэдэн гэр бүл байгааг судлах л хэрэгтэй. Энэ бүхэн чинь Монгол улсын Үндэсний аюулгүй байдалтай салшгүй холбоотой” гэсэн юм. Үнэхээр миний л мэдэхийн хоол идэхийнхээ өмнө алгаа хавсарч залбирч байгаад “бидэнд энэ их идээ ундааг илгээсэн ертөнцийн эзэн таньд баярлалаа” гэж хэлээд тавагтай шөлөө халбагаддаг айл өрх бишгүй л байдаг. Бид түүнийг жоготойхон гэгч нь хараад өнгөрдөг болохоос Үндэсний аюулгүй байдалтай холбож үзэж, асуудалд хандаж байсан уу. Мөн манай улсад Үндэсний аюулгүй байдлыг хангах чиг үүрэг бүхий Байгаль орчныг хамгаалах алба, Гаалийн алба, Дипломат алба, Гамшгаас хамгаалах алба, Мэргэжлийн хяналтын алба, Зэвсэгт хүчин бусад цэрэг, Татварын алба, Тусгай алба, Гадаадын иргэн харьяатын асуудал эрхлэх алба, Иргэн, хуулийн этгээд, эд хөрөнгийн эрхийн улсын бүртгэлийн асуудал эрхэлсэн алба зэрэг газар байдаг аж. Тэднээс хамгийн их үүрэгтэй нь Мэргэжлийн хяналтын алба ажээ. Мэргэжлийн хяналтын байцаагчид монгол хүний ген буюу удмын санг хамгаалах үүднээс хүнсний аюулгүй байдалд хамгийн их анхаарлаа хандуулах учиртайг энэ үеэр онцолж байлаа. Түүний илтгэлийн бас нэгэн сонирхолтой тал нь төрийн албан хаагч дарга, даамлуудтай холбоотой тэдний гаргадаг захирамж, тушаал, шийдвэртэй холбоотой асуудал байлаа. Аль ч шатны Засаг дарга хийгээд байгууллагын удирдах албан тушаалтан гаргаж буй захирамж, тушаалаа Үндэснйи аюулгүй байдлын үзэл баримтлал уялдуулах тал дээр анхаарах ёстойг сануулсан юм. Энэ үнэхээр үзэгний үзүүрээр хэн нэгний хувь заяаг шийддэг, гарын үсгээр асуудлыг нэг мөр болгодог дарга нарын хувьд бодох л зүйл байлаа. Сэтгүүлчийн хувьд энд сонирхолтой жишээ татмаар санагдана. 2015 оны эхээр аймгийн Засаг дарга агсан Г.Зоригт “Түнт хүрээ” гэх Улаанбаатарын компанитай журмын хашаа байгуулах тухай гэрээг байгуулсан байдаг. Тэгвэл энэ гэрээ Үндэсний аюулгүй байдал талаасаа Эрдэнэтчүүдийн хувьд ноцтой хохирол учруулж байсныг Б.Нэргүй даргын илтгэлийг сонссоныхоо дараа л албан тушаалтнуудын буруу шийдвэр ямар аюултайг ойлгосон.Дарга, албан тушаалтнууд хэн нэгнийг ажилд авах, ажлаас халахдаа ч таны гаргаж буй шийдвэр Үндэсний аюулгүй байдалтай нийцэж байна уу гэдгийг бодох хэрэгтэйг илтгэгч сануулсан юм.            Түүний илтгэлийн бас нэгэн сонирхолтой хэсэг нь Үндэсний аюулгүй байдлын үзэл баримтлалд туссан Мэдээллийн аюулгүй байддлын тухай мэдээлэл сонирхол татлаа. Үндэсний аюулгүй байдлын үзэл баримтлалын 3.1 буюу ҮАБ-ын бүрэлдэхүүн хэсэгт “Мэдээллийн аюулгүй байдал”-ын тухай байдаг аж. Мэдээллийн аюулгүй байдал гэдэгт Мэдээллийн салбарт үндэсний ашиг сонирхлыг хамгаалах Мэдээллийн бүрэн бүтэн байдал Мэдээллийн нууцлал Мэдээллийн хүртээмжтэй байдал багтдаг юм байна. Төрд ажиллах нь нэр төрийн хэрэг. Иймдээ ч төр дархлаатай байх хэрэгтэй. Төрд ажиллаж байгаа хүн бүхэн төрийн Тусгаар тогтнол, Үндэсний аюулгүй байдалд өөрийн оруулах хувь нэмрийг төрийн албан хаагчид бодох ёстой. [sgmb id="1"]