Монгол улсын Төрийн албаны зөвлөл /ТАЗ/-ийнхөн баасан гарагт Орхон аймаг, Эрдэнэт хотод ажиллав. Тэднийг энэ удаад Төрийн албаны зөвлөлийн дарга, тэргүүн зэргийн түшмэл Б.Цогоо ахалж бүрэлдэхүүнд нь тус зөвлөлийн орон тооны гишүүн Б.Баатарзориг, С.Цэдэндамба, гишүүн Монгол Улсын Ерөнхийлөгчийн Тамгын газрын дэд дарга Б.Нэргүй, ТАЗ-ийн ажлын албаныхан багтсан. Төрийн албаны зөвлөлийн ажлын гол зорилго нь орон нутгийн салбар зөвлөлийн ажил байдалтай газар дээр нь танилцах, Орхон аймгийн төрийн албан хаагчдад сургалт зохион байгуулах, Төрийн албаны хууль тогтоомжийн хэрэгжилттэй танилцахад чиглэгдсэн байна. ТАЗ-ийн Ажлын алба, Орхон аймгийн салбар зөвлөлөөс “Төрийн үйлчилгээ-ололт, туршлага” сэдэвт сургалтыг төрийн албан хаагчдын дунд зохион байгуулж тэдэнд мэргэжил арга зүйн зөвлөгөө өглөө. Сургалтыг нээж ТАЗ-ийн дарга Б.Цогтоо хэлсэн үгэндээ “Монгол Улсын Төрийн албаны тухай хууль 1995 онд батлагдсан. Үүнээс хойш дөрвөн удаа нэмэлт өөрчлөлт орсон. Төрийн албаны зөвлөл Төрийн албаны тухай хуулийг хэрэгжүүлэх, хэрэгжилтийг хангах, Төрийн албаны стандартыг амьдралд хэрэгжүүлэх, төрийн албан хаагчдын нийгмийн баталгааг хангах, эрх ашгийг хамгаалах чиг үүрэгтэй ажилладаг. Улсын хэмжээнд 48 салбар зөвлөл ажилладаг. Үүний 13 нь Төрийн захиргааны төв байгуулагад, 12 нь яамдад, 22 нь аймаг, нийслэлд байна. Үүний нэг болох Орхон аймаг дахь Төрийн албаны салбар зөвлөл ажил үйлсээрээ бусдыгаа магнайлдаг. Зөвхөн сүүлийн гурван жилд гэхэд танай салбар зөвлөлийнхөн улсад эхний байрт шалгарч байсныг онцлоход таатай байна” гэлээ. Улсын хэмжээнд төрийн 185 мянган төрийн албан хаагч ажилладаг. Үүний 67.3 хувь нь эрэгтэй, 32.7 хувь нь эмэгтэйчүүд юм. Нийт ажиллагсдын 44.6 хувийг 35 хүртэлх насны залуус эзэлдэг. Манай аймагт төрийн 92 байгууллагад 4693 албан хаагч ажиллаж байна. [sgmb id="1"]