“Эрдэнэт үйлдвэр”-ийн Ерөнхий захирлаар томилогдсон Х.Бадамсүрэн маргааш амжихгүй бол баасан гарагт Эрдэнэтэд хүрэлцэн ирж албан ажлаа хүлээн авах гэнэ. Харин энэ хооронд Х.Бадамсүрэнгийн багт багтаж үйлдвэрийн орлогч захирлын суудалд тухалчих гэсэн олон хүн энд тэнд хөлхөж ёстой л нөгөө эр хүний 13 мэхээ уралдуулж суугаа бололтой. МАН-ын Удирдах зөвлөл болон төрийн ордон хавиар “Эрдэнэт үйлдвэр” ХХК-ийн үйлдвэрлэл эрхэлсэн орлогч захирлаар ирчих санаатай Гаадангийн Шархүү хэмээх эрхэм гүйж байгаа сураг гарч байна. Тэрбээр өмнө нь нэлээн дээр тус үйлдвэрийн орлогч захирлаар ажиллаж байсан. 2004-2008 онд Орхон аймгийн Засаг даргаар ажиллаж байсан. Одоогоос хоёр жилийн өмнө Монголын Баяжуулагчдын холбооны тэргүүний алба хашиж уул уурхайгаас нэг их хөндийрчихөлгүй явсан. Түүний нэр үйлдвэрлэл эрхэлсэн орлогчийн суудалд нэлээн дээгүүр яригдаж байгаа ч мэргэжлийн боловсон хүчнүүдийн хувьд тэр дундаа үйлдвэрийн инженер техникийн ажилчдын дунд “Шархүү л биш шүү” гэсэн явган яриа гарч байгаа дуулдана. Учир нь “Г.Шархүүгийн хувьд асуудлыг шийдэх, шийдвэр гаргахдаа хойрго удаан, асуудалд чигч шударга байр суурь баримталдаггүй хэт бөөрөнхий” гэсэн мессеж хөвөрч эхэллээ. Тэгээд ч Г.Шархүү Эрдэнэтэд ирвэл Бурхан багшийн сэрэг дүр гээд түүний хийж дуусаагүй ажил өнөө хэр хэл ам таталж байгаа нь үнэн. Төрийн байгууллагын ажилчдын нэг өдрийн цалингаас эхлээд “Эрдэнэт үйлдвэр”-ээс олон тэрбум төгрөг гаргуулж, буян амлаж бурхан бүтээхээр болсон ч өнөөдөр Эрдэнэтчүүд Бурхан багшийн сэрэг дүртэй ч юм шиг, үгүй ч юм шиг сэрийсэн байгууламжийг харж олон жил өнгөрсөн нь нууц биш. Үйлдвэрлэл эрхэлсэн орлогч захирал болох гэсэн хүмүүсийн нэр дунд Ш.Гэзэгтийн нэр дуулдаж байгаа гэнэ. Тэрбээр өмнө нь энэ албан тушаалыг хашиж байсан. Өөнтөгч зарим нэгний хувьд Ш.Гэзэгтийг орлогч захирлын ажлыг Д.Даваасамбуугаас хол илүү хийнэ гэж байгаа ч түүнийг “багийн тоглолтод муу хэтэрхий хувиа хичээдэг, амиа боддог” гэсэн яриаг гаргаад амжсаныг бодоход дээгүүр нэлээн тэмцэл өрнөж үйлдвэрлэл эрэхлсэн орлогч захирлын суудал үнэ хүрч байгаа бололтой. Аймгийн Засаг дарга асан Д.Дэлгэрбаяр үйлдвэрийн орлогч захирал болохоор хөөцөлдөж байгаа гэсэн сураг ажиг нэлээн эртнээс гарах болсон. Түүний хувьд улсын алдарт уяач цолтой. Энэ талаас нь харвал Монголын морин спорт уяачдын холбооны тэргүүн, УИХ-ын дарга М.Энхболдтой хобби нэг. Адууны хөлс үнэртэж, хурдан морины уяан дээр хусуур бариад зогсох нь эр хүний эрхэм жаргал хэмээсэн уяачид бие биенээ энд тэнд багагүй өөд нь татаж байгаа. Нэгэн цагт “ангийн анд” буюу аймгийн Засаг дарга нар болох Д.Дэлгэрбаяр Ерөнхий сайд Ж.Эрдэнэбат нар ойр дотно байсан гэгддэг. Энэ шугамаар Д.Дэлгэрбаярын хувьд Ерөнхий сайдын дэмжлэгээр үйлдвэрийн орлогч захирал болох тухай шуум нисч байна. Бас дээр нь үйлдвэрлэл эрхэлсэн орлогч захирлын суудлын төлөөх сунгаанд Х. Мэргэнбаатар гэдэг нэр цохиж явна. Түүнийг энэ удаад УИХ-ын гишүүн Д.Дамба-Очир сойж байгаа гэнэ. Өөрөөр хэлбэл, эрхэм төрийн түшээ маань сонгогчдынхоо төлөө гэхээсээ илүүтэй үйлдвэрийн удирдлагын багт өөрийн хүнээ чихчих санаатай хор найруулж байгаа гэх яриа Эрдэнэтээр нэг хөвөрч байна. Х.Мэргэнбаатар гэх эрхэм ч өнгөтэй өөдтэй бүхнээ бариад Д.Дамба-Очир гишүүний үүдийг сахиж байгаа бололтой. Үйлдвэрийн 49 хувийн талынхан үйлдвэрийн орлогч захирлуудаас тэргүүн дэд захирал, Санхүү эрхэлсэн орлогч захирлын суудлыг авах тухай тохиролцоо хийгдсэний дараа бүх зүйл ил болно гэх албан бус мэдээлэл байна. Тэр тусмаа тэргүүн дэд захирлын суудалд Б.Шинэбаатар хэвээр ажиллах тухай чих дэлсэж байна. Харин Б.Шинэбаатарын хувьд асуудал тийм ч амархан байхгүй болов уу. Хөгжлийн банк тойрсон асуудлуудын дунд Б:Шинэбаатарын нэр дуулддаг. Тэрбээр “Фортуна” Б:Батбаярын яамны төрийн нарийн бичгийн даргаар ажиллаж байсан. Нэг үгээр хэлбэл, Хөгжлийн банкнаас гарсан тэр их мөнгө хөрөнгөний ард Б.Шинэбаатарын нэр байгаа гэж зарим нэг улстөрч, улс төрийнхөн ч харддаг. Хөгжлийн банкны асуудлаас хуурай гарч чадвал Б.Шинэбаатар 49 хувьтангуудын төлөөний хүн байх нь ил болж байгаа ч түүний хувь заяа Хөгжлийн банкны захирал асан Б.Мөнхбатын гарт байгаа гэнэ. Ямар ч байсан “Эрдэнэт үйлдвэр”-ийн Ерөнхий захирал томилогдсон. Харин түүний багт багтах хүсэлтэй эрхмүүдийн нэр энд тэнд дуулдаж, орлогч захирлуудын томилгоо тун удахгүй жигдрэх нь ээ. [sgmb id="1"]