Эрхэм хүмүүн Доржсүрэнгийн Гэрэлмаа манай сайтад “Сэтгэлийн боловсролд” буланг нээж, өөрийн сэтгэл дэх үгсийг, бодлыг бусадтай илэн далангүй хуваалцахыг хүссэн билээ. Хүний дотор юу оршнов, тэр их агуу хүчийг хэн жолоодон зөв залж, амьдралд хөл алдахгүй явах вэ гэдэг зөвхөн танаас, биднээс шалтгаална. Сэтгэл доторхоо ариусгаж, өөрийгөө, үр хүүхдээ зөв сайхан хөтлөхөд Доржсүрэнгийн Гэрэлмаагийн сэтгэл зүйн зөвлөгөө, засал, аргадал, тайтгарал зэрэг таны хүсэн хүлээсэн агуу бүхнийг танд өгөх болов уу. Та наашаа суугаад, сэтгэлээ нээгээрэй. Доржсүрэнгийн Гэрэлмаа “Мөнх Алтан Хас” ТББ-ын тэргүүн Би бичих дуртай. Билэг их ухааныг үр удам болсон наддаа үлдээсэн өвгөд дээдсүүддээ туйлаас талархдаг. Өр зүрхэнд минь Монголчуудаа гэх, Монгол газар нутгаа гэх, цаашлаад эх дэлхий минь, эгэлгүй оршихуй минь гэх их гал асаж дүрэлзээд байдаг болохоор би бичиж л суудаг. Баяр бахдал, их эрч амтагдах үе байхад, даанч дээ гэж халаглах дууг ч би дотроосоо сонсдог. Магадгүй миний судсаар тэртээ 13-р зуунд эрчлэгдэж боссон хөх өвгөдийн минь хүч эрчлэгдэн буй. Ганцхан миний ч гэлтгүй, энэ цаг үед Монгол нутагт минь хүмүүний төрөлд төрсөн бүхний халуун голоор дэлхийг эрхэндээ хурааж явсан хүчирхэг өвгөдийн хүч халгиж цалгин буй. Бид энэ хүчийг сэрээх ёстой. Бид дэлхийд тэргүүлэх үүргээ гүйцэтгэх ёстой. Сайн сайхны төлөө тэр хүчийг асаах ёстой. Үүнийг уншиж суугаа хүмүүн та эдгээр үгсийг бичиглэгч намайг дотроо юу гэж бодож суугааг би таамаглаж байна. Гэхдээ би халирахгүй, шантрахгүй, Хэдхэн жилийн дараа миний дотор ассан гал Монгол хүн бүрийн зүрх сэтгэлд асна. Энэ бол гарцаагүй үнэн. Тэр үед олноороо сэрсэн болохоор бие биенээ гайхахгүй, бүгд нэгэн зүгт харж, их хүчээр дэлхий, ертөнцөө сайн сайхнаар хөглөнө. Би идээний дээж гэгддэг сархадыг огт хэрэглэдэггүй ээ. Гэхдээ тэр л сайхан цагийн төлөө хундага тулгахад бэлэн байна. Монголчууд минь. Дэлхийг оюунаар хамтдаа байлдан дагуулъя. Сэрцгээ, Монгол түмэн минь. Өвгөдийнхөө нандин их хүчийг өөр өөрийн амин сүнсэнд сэрээцгээ. Сэрж босох цаг нь иржээ... Цаг нь ирчихжээ... Сайхан бүхэн дэлгэрэх болтугай. Хурай, хурай, хурай Шунал дагуулсан хүний дотор амиа хичээх үзэл нь бат оршсоор байдаг. Шуналгүйг дадуулсан эрхмүүд гэрээсээ толгойгоо ч цухуйлгахгүй байгаад байна л даа. Улс эх орныхоо төлөө, ирээдүй хойчийнхоо төлөө ил гарах цаг нь болжээ. Сэтгэл зүрхэндээ ариуныг бат оршоож, эх орныхоо төлөө, элгэн садныхаа төлөө, энэхэн цэнхэр дэлхийнхээ төлөө цохилох зүрхтэй бүхэн эвлэлдэн нэгдэж, цөвүүн цагийн хаалгыг хаах цаг болжээ. Эрх мэдэл, эд хөрөнгөний шуналыг бүрмөсөн хаясан олон хүмүүс тэнгэрлэг заяат Монголчууд дотор минь бий. Миний ард түмэнд тэднийг таних сод мэргэн ухаан бас бий. Энэ бүхэн дэлгэрэх болтугай. Сайхан цагийн харанга дэлдэж айсуй... Дэл, сүүл нь нь солонгын долоон өнгө цацрааж салхинд эрхлэн хийсэж, хүчирхэг дөрвөн туурайгаараа хөх оршихуйг тамгалсан эрдүү сайхан загал бор морийг унасан, улалзсан улаан гал мэт хүчирхэг нэгэн хөрстөд сайны чимээг тунхаглан заларчээ. Хажууд нь төрх байдлыг нь харвал тааралдсан бүхэн сүрэнд дарагдаж мууг дахиж хийхгүй хэмээн тангараг өргөмөөр, өвгөдийнхөө нандин их хүчээр хар бүхнийг дарах эгэлгүй их энэрлийг дотооддоо асааж, хилэн хар морийг хөлөглөсөн нэгэн зуузай холбон хатирнам. Даваан дээр зөрөөд өнгөрсөн хоёр хүн ч үйлийн үрээр таардаг гэнэм. Тийм дээ, Учиргүй юм гэж нэгээхэн ч үгүй. Учиг бүгдийг тайлах ухаан нь хүмүүн заяанд төрсөн бүхний дотоодод оршин буй. Тэрхүү сайхан оршиухуйг сэрээх цаг нэгэнт ирж. Монгол түмний минь билэг их ухаан үтэр түргэн сэрэх болтугай. Үүргээ ухамсарлах цаг болжээ, төрийн түшээд ээ... Цаг үе өөрчлөгдөж байна. Өнгө мөнгө тийм ч их чухал биш гэдгийг хүмүүс хүлээн зөвшөөрч эхэлж байна. Ертөнц оюун ухааны эрин лүү шилжээд орчихсон. Монголчууд түүхийн тодорхой цаг үеүдэд энэ дэлхийд тэргүүлэх чиглүүлэх үүргийг гүйцэтгэх онцгой үүрэгтэй хүмүүс. Сансрын тойргоос хагацаагүй 6 зүйлийн амьтны төрөл бий. Монголчууд цөөхөн их нандин үндэстэн. Тэнгэрийн төрлөөс хүний төрөлд төрөгсөд Монгол газар нутагт ихэвчлэн төрдөг нь хуудуу үгүй үнэн билээ. Бидний өвөг дээдэс хөрстөд амьдрах цаг дор их үйл хэргийг бүтээж, энгүй цагааныг дэлгэрүүлж байсан нь тэдний урьд төрөл тэнгэрт байсантай холбоотой. Энэ бүхнийг бичдэгийн учир нь үйлийн үрийн тойрогт оршсон бүхэн зөв замаар замнах цаг нь ирсэн гэдгийг дуулгаюу гэсэн юм. Оршихуй бүхэлдээ хайр учраас хүн бүхнийг зөв зам руу нь хөтөлж байна. Эд баялаг, эрх мэдэл, бүхнээс өндөрт байх гэсэн шуналаа татах цаг одоо болсоон. Эрх мэдэлтэй байж үзлээ, эд хөрөнгөтэй ч байж үзлээ, одоо гэгээн сайхан ирээдүйг цогцлоох их хүчийг асаах цаг болжээ, төрийн түшээд минь. Өөрөө өөрийнхөө хийсэн сайхан үйлээр дэвжих цаг байхад өөрөө өөрийнхөө шуналдаа хүлэгдсээр эрдэнэт хүний амьдрал дуусах цаг гэж байдаг гэдгийг ухаарнаа гэдэгт найдаж байна. Орчлон Монголчуудыг хүлээж байна. Сайн сайхан бүхнийг асааж бадамлуулна гэж хүлээж байна. Балчиг намгаас энэ дэлхийг аварна хэмээн итгэл өвөрлөн хүлээж байна. Орчлонг бүхэлд нь хайр гэдгийг тунхаглаач хэмээн хүсэж байна. Тийм ээ. Хүлээсээр л байна. Ухаарал гэдэг гэрлийг амин сүнсэндээ асаагаад, тэнгэрийн их хайр ивээлээр хүчээ нэмж, эргэх замбуулингаа, эгэлгүй их оршихуйг хайр энэрэл, зөв бүхнээр хамтдаа хөглөцгөөе. БИД МӨНХ ХӨХ ТЭНГЭРТЭЭ ИВЭЭГДСЭН, ХӨХ ТОЛБОНДОО ӨВГӨДИЙНХӨӨ НАНДИН ЭРЧИЙГ ӨВЛӨЖ ТӨРСӨН ЭЛЭГ НЭГТ МОНГОЛЧУУД ШҮҮ ДЭЭ... [sgmb id="1"]