Сум, дүүргийн ИТХ-ын нэмэлт санал хураалт энэ сарын 23-нд болж өндөрлөв. Ингэснээр Баян-Өндөр сумын ИТХ-ын сонгуульд өрсөлдөн ялалт байгуулсан нэр дэвшигчид тодорч түр үнэмлэхээ гардан аваад байгаа. Харин манай аймгийн хувьд нэр дэвшигчдийн авсан санал нь тэнцсэн тохиолдол гараагүй учраас дахин санал хураалт болохгүй. Тэгвэл бид энэ удаад шинээр байгуулагдах Баян-Өндөр сумын ИТХ-ын төлөөлөгчдийн талаарх сонирхолтой тоон мэдээллийг хүргэж байна. Баян-Өндөр сумын ИТХ-д МАН-аас 26, АН-аас таван гишүүн сонгогдож нийтдээ 31 төлөөлөгчтэй ажиллах аж. Энэ удаагийн Баян-Өндөр сумын ИТХ-ын сонгуульд олонхийг бүрдүүлж байгаа МАН-ын хувьд Зэст, Уурхайчин, Бүрэнбүст, Согоот, Дэнж, Эрдэнэ, Их залуу, Наран, Шанд, Цагаанчулуут, Булаг, Баянбулаг, Баянцагаан, Говил, Даваат, Яргуйт, Уртын гол багт ялалт байгуулжээ. Харин Хүрэнбулаг, Рашаант багийн сонгогчид хоёр мандатаа эхийг нь эцээж, тугалыг нь тураахгүйн тулд МАН, АН-д тус бүрт нь нэг нэгээр нь өгсөн байна. Уурхайчдын өлгий Оюут багийнхан энэ удаад АН-ын нэр дэвшигчид болох Оюуны Мөнх-Од, Насанжаргалын Мэндбаяр нарт итгэл үзүүлсэн байна. Уртбулаг багийн сонгогчид АН-ын нэр дэвшигч Ганболдын Ганзоригийг сумын хуралд өөрсдийг нь төлөөлж чадна хэмээн итгэл үзүүлсэн аж. Тэгвэл Рашаант багийн 931 сонгогч АН-ын нэр дэвшигч Ганбаатарын Ганзоригийн төлөө саналаа өгчээ. АН-ын тав дахь хүн нь Хүрэнбулаг багт ялалт байгуулж сумын ИТХ-ын төлөөлөгч болсон Бямбасүрэнгийн Батгэрэл юм. Тэрбээр энэ удаад 1014 сонгогчийн саналыг өөртөө татжээ. -Баян-Өндөр сумын ИТХ-ын 31 төлөөлөгчийн 9.6 хувь нь буюу гурав нь эмэгтэй. Тэднийг Оюуны Мөнх-Од /АН/, Өлзий-Очирын Минжмаа /МАН/, Хандрагчаагийн Төгсбаяр /МАН/ гэдэг. -Баян-Өндөр сумын ИТХ-д Ганболдын Ганзориг /АН/, Ганбаатарын Ганзориг /АН/, Пэрэнлэйн Ганзориг /МАН/ гэсэн амьдай нартай болжээ. -Баян-Өндөр сумын ИТХ-ын 31 төлөөлөгч бүгд дээд боловсролтой, тэдний олонх нь инженер, эдийн засагч мэргэжилтэй. -Уурхайчин багийн хоёр мандатыг МАН-ын гишүүд болох Ц.Батцэнгэл, Ц.Шинэбаяр нар авсан. Тэд тус бүртээ адилхан 1157 санал авчээ. -Сумын ИТХ-ын 31 төлөөлөгчөөс МАН-ын гишүүн Баянцагаан багаас сонгогдсон төлөөлөгч Баттөрийн Баасансүрэн хамгийн их буюу 1442 сонгогчийн санал авчээ. Харин хамгийн бага саналаар төлөөлөгч болсон эрхэм бол Уртын голоос сонгогдсон Даваасүрэнгийн Дарханбаяр /МАН/ 557 сонгогчийн санал цуглуулжээ. -2012-2016 оны аймгийн ИТХ-д Р.Улаанхүү гэдэг төлөөлөгч байсан бол 2016-2020 оны сумын ИТХ-д Э.Цагаанхүү нэртэй төлөөлөгч Баян-Өндөр сумын ИТХ-д суухаар боллоо. Р.Улаанхүү Булаг багаас сонгогдож байсан бол Э.Цагаанхүүг сумын хуралд Шандчууд төлөөлөгчөөр сонгосон байна. Ингэснээр АН-д “Улаан хүү” байсан бол МАН-д ч “Цагаан хүү” гараад ирлээ. Монголын уран сайхны “Төөрсөөр төрөлдөө” киноны гол дүр Бат “Надад улаан, цагаан хоёулаа бий” гэж хэлдэг. Тэгвэл Эрдэнэтийн сонгогчид МАН-д ч “Цагаанхүүнүүд” шаардлагатай газраа хэрэгтэй хэмээн Цагаанхүү гэсэн нэрийн сонголт хийсэн бололтой. [sgmb id="1"]