Манай аймгийн ИТХ 33 мандаттай. ИТХ-ын долоо дахь удаагийн сонгуулийн үр дүнгээр МАН 30, АН 3 суудал авсан. Тэгвэл МАН-ын нэрээр аймгийн ИТХ-ын төлөөлөгчөөр сонгогдсон зарим хүмүүс Засгийн газрын “урилгаар” Монголын төрд зүтгэхээр нийслэлийн зүг нүүдэллэсэн байна. “Уурхайчин” багийн иргэдийн итгэлийг хүлээн орон нутгийн удирдах дээд байгууллага аймгийн ИТХ-д төлөөлөгчөөр сонгогдсон, ИТХ-ын тэргүүлэгч Д.Батбилэг Монгол улсын Засгийн газрын хэрэгжүүлж байгаа “Тавантолгой дулааны станц” төслийн захирлаар томилогдсон байна. Өмнө нь энэ албыг Монгол улсын Засгийн газрын гишүүн, сайд асан М.Энхсайхан хашиж байсан юм. Мөн аймгийн ИТХ-д Баянбулаг багаас сонгогдсон төлөөлөгч Д.Даваадорж Уул уурхай, хүнд үйлдвэрийн яамны Стратеги төлөвлөлтийн газрын даргын суудалд тухалжээ. “Амгалан оршихуйн ордон”-ы эзэн Д.Даваадоржийг энэ суудалд суулгасан хүн нь УИХ-ын гишүүн Л.Энх-Амгалан хэмээн намын гишүүд нь шивэр авир хийж байна. Аймгийн ИТХ-ын сонгуулийн сурталчилгааны үеэр “Таны ачааг би үүрье” гэж ирээд л иргэдээс санал гуйж байсан эрхмүүд эхнээсээ ийнхүү хувиа хичээж, довоо ногооруулж байгаа бололтой. Монгол улсын Төрийн албаны тухай хууль, бусад хууль тогтоомжид зааснаар Д.Батбилэг, Д.Даваадорж нар аймгийн ИТХ-ын төлөөлөгчөөсөө татгалзаж, улмаар Орхон аймгаас шилжих болох нь. Тэгвэл нөхөн сонгууль болох уу гээд олон асуудал яригдах ч энэ удаад аймгийн ИТХ-ын удирдлагын зүгээс нам гүмхэн сууна. 2012-2016 оны хооронд аймгийн ИТХ-ын төлөөлөгч, тэргүүлэгч “Чингисийн чулуу” ХХК-ийн захирал Д.Чулуунбат “Эрдэнэт үйлдвэр”-ийн Улаанбаатар дахь төлөөлөгчийн газрын даргаар томилогдож “Нийслэл хүү” болсон. Өөрөөр хэлбэл, төлөөлөгчийн ажлаа өгөлгүй давхар дээлтэй манаргаж ИТХ-ын болон тэргүүлэгчдийн хуралдаандаа алдаг оног суудаг байсан “Тэргүүн туршлага”-ыг эрх баригчид хэрэгжүүлэх үү, аль эсвэл тухайн тойрогт дахин сонгууль явуулах уу гэдэг нь эргэлзээтэй байна. Ямар ч байсан Уурхайчин, Баянцагаан багийн иргэд аймгийн ИТХ-д тус бүртээ хоёр төлөөлөгчтэй, тэд бидний төлөө чөмөгөө дундартал ажиллаж байгаа гэж бодож байсан ч Д.Батбилэг, Д.Даваадорж нар аль хэдийнэ “Нийслэл хүү” болохоор Улаанбаатарыг зорьсон бололтой.