“Сур сур бас дахин сур” гэдэг шиг сүүлийн үед “Томилгоо томилгоо томилгоо, бас дахин томилгоо” хэмээх хэлц үг гарчээ. Арга ч үгүй, засаг төрийн эрхийг гартаа авсан МАН-ын зүгээс дээр доргүй, өдөр алгасалгүй шахам томилгоо хийж байна, Монгол орны хэмжээнд. Манай аймгийн хувьд ч томилгоо үргэлжилсээр. Хөдөлмөр, нийгмийн хамгааллын сайд Н.Номтойбаярын 2016 оны 9 дүгээр сарын 19-ний өдрийн Б/99 тоот тушаал гарч аймгийн Хөдөлмөр, халамжийн үйлчилгээний газрын даргын үүргийг түр орлон гүйцэтгэгчээр Хандаагийн Эрдэнэбатыг томилсон байна. Монгол улсын Засгийн газрын тогтоол гарч зарим хэрэгжүүлэгч агентлагуудад бүтцийн өөрчлөлт хийж эхэлсэн байдаг. Үүний дагуу өмнө нь тус тусдаа байсан Халамж, үйлчилгээний газар, Хөдөлмөрийн хэлтсийг нэгтгэсэн зохион байгуулалтад оруулсан. Энэ хүрээнд дээрх хоёр байгууллага нэгдэж, Хөдөлмөр, халамжийн үйлчилгээний газар болж даргын ажлыг түр орлон гүйцэтгэгчийг томилсон байна. Сайдын тушаалын дагуу Х.Эрдэнэбатад ур чадварын нэмэгдэл 5 хувь, төрийн ажилтны нэмэгдэл 20 хувийг олгохыг холбогдох албаныханд үүрэгдсэн байна. Харин хэл амгүйхэн шиг “ноосоо тушаах” өргөдлөө гаргасан өмнөх дарга Г.Батбаатарт 6 сарын цалинтай нь тэнцэх хэмжээний урамшуулал олгохоор болжээ. Архангайн уугуул, ГОК-ын Чанар хяналтын хэлтэст инженерээр ажиллаж байсан гэх Х.Эрдэнэбатын хувьд залуугаараа даргын суудалд заларсан ч тэрбээр Хөдөлмөр, халамж үйлчилгээний газраас 30 гаруй хүнийг орон тооны цомхтголд оруулах “хэцүү даалгавар”-тай үлдсэн байна. Бүтцийн өөрчлөлтийн дагуу хоёр газрыг нэгтгэснээр 30 гаруй хүн ажилгүйчүүдийн эгнээнд шилжих болоод байгаа. Хуучнаар Халамж үйлчилгээний газар, Хөдөлмөрийн хэлтэст 2013-2016 оны хооронд АН-ын нэрээр олон хүн ажилд орж, зарим нэг хүнд зориулж орон тоо ч гаргаж байсан гэдэг. Цагтаа аймгийн ИТХ-ын даргаар ажиллаж байсан Х.Лувсаншарав Хөдөлмөрийн хэлтсийн дарга байсан. Болохгүй болохоор нь тушаал буулгаж ахлах мэргэжилтэн гэдэг орон тоог гарган тэтгэвэрт нь гартал зүтгүүлэхээр тухайн үед шийдэж байсан бол аймгийн ИТХ-ын дарга асан Б.Мягмарсүрэнгийн эхнэрийн дүү Хөдөлмөрийн хэлтэст ажилд орж байжээ. Эрх баригчдын хувьд энэ мэт АН-ын нэрээр ажил, албан тушаалд очсон нөхдийг юуны түрүүнд бүтцийн өөрчлөлтөд хамруулах гэж буй бололтой нарийвчилсан судалгаа гаргаж байгаа аж. Мөн Улсын бүртгэлийн Ерөнхий газрын даргын тушаалаар аймгийн Улсын бүртгэлийн хэлтсийн даргаар МХГ-ын дэд дарга Д.Мөнхболдыг томилсон байна. Улсын бүртгэлийн ерөнхий газраас ажил хүлээлцэх комисс тун удахгүй манай аймагт ирж ажиллах гэнэ. Манай сайтын зүгээс энэ сарын 2-нд “Томилгоо ингэж хийгдэх бололтой” гарчигтай нийтлэлийг уншигчдад хүргэж байсан. Уг нийтлэлд нэр нь бичигдсэн хүмүүс ийнхүү эхнээсээ даргын суудал, засгийн унаан дээр заларч эхэллээ. Тэрхүү нийтлэлд гарсан ажил, албан тушаалд томилуулахаар нэр дэвшүүлж буй боловсон хүчний нэрсийг дахин хүргэж байна. Байгууллага аж ахуйн нэгж                   Удирдлагад томилуулахаар санал                                                                                 болгож буй боловсон хүчний нэр  Эрдэнэтийн дулааны цахилгаан станц                                 Л.Эрхбаатар Эрдэнэт Булганы цахилгаан түгээх сүлжээ ТӨХК             Ц.Баяржаргал Орхон аймгийн МСҮТ                                                                 Н.Төгсбаатар Мэдээлэл холбооны сүлжээ ТӨХК-ийн Орхон салбар     Г.Эрдэнэбат “Монгол шуудан” ТӨХК-ийн Орхон салбар                         Б.Түмэндэмбэрэл Төмөр замын “Эрдэнэт” өртөө                                                   М.Амарсайхан Сэлэнгэ голын сав газрын захиргаа                                        Э.Ганхуяг Хөдөлмөр, халамжийн үйлчилгээний газар                         Х.Эрдэнэбат Улсын бүртгэлийн хэлтэс                                                           Д.Мөнхболд Орхон аймгийн Гаалийн газар                                                 Т.Ариунболд Татварын хэлтэс                                                                            Ц.Нармандах Нийгмийн даатгалын хэлтэс                                                     Г.Ганхуяг Бүсийн оношлогоо эмчилгээний төв                                      Б.Батсүх Шүүхийн шинжилгээний алба                                                 Б.Болдбаяр Иргэний харьяалал шилжилт хөдөлгөөний            Ерөнхий газрын Хойд бүс дэх газар                                            Б.Хашчулуун Ус, цаг уур орчны шинжилгээний алба                                      Я.Тунгалаг Монголын цахилгаан холбоо ТӨХК-ийн Орхон салбар        Ц.Алтаншагай 18. Орхон АЗЗА ТӨХК                                                                       Д.Мөнхбат