Аймгийн ИТХ-ын 7 дахь удаагийн сонгуулийн бүрэн эрхийн хугацааны ээлжит хоёрдугаар хуралдаан энэ сарын дундуур боллоо. Ээлжит хоёрдугаар хуралдаанаар ИТХ-ын төлөөлөгчдийн хурлын 7 дахь удаагийн сонгуулийн бүрэн эрхийн хугацааны бодлогын Үндсэн чиглэл батлах тухай ИТХ-ын хороо байгуулах, бүрэлдэхүүнийг сонгох тухай Аймгийн 2015 оны Нэгдсэн төсвийн гүйцэтгэлийн аудитын дүнгийн тухай Аймгийн 2015 оны төсвийн гүйцэтгэл батлах тухай Аймгийн Орон нутгийн хөгжлийн сангийн зарцуулалт, Улсын болон орон нутгийн төсвийн хөрөнгөөр 2015 онд санхүүжүүлсэн хөрөнгө оруулалтын төсөл, арга хэмжээний хэрэгжилт, үр дүн, 2015 оны төсөвт байгууллагуудын санхүүгийн тайлан, аудитын тухай Аймгийн 2016 оны тодотгосон төсөв батлах тухай Бусад гэсэн долоон асуудал хэлэлцсэн юм. Хэлэлцсэн асуудлаас хамгийн  анхаарал татсан нь Аймгийн 2016 оны тодотгосон төсөв батлах тухай байлаа. Үүн дотор “Орон нутгийн төсөв хөрөнгө оруулалтаар зарцуулах зардлын тодотгосон жагсаалт”-ын Эд хогшил, машин тоног төхөөрөмж дэд хэсгийн 5-д “Аймгийн ИТХ-ын ажлын албанд тоног төхөөрөмж худалдан авахад зориулж 115 сая төгрөг гаргах” гэсэн заалт  өөрийн эрхгүй эргэн харахад хүргэсэн. Улс орны төсөв санхүү хүндэрч, Монгол орон бараг л дампуурлын ирмэг дээрээ ирчихсэн энэ цагт цоо шинэхэн төлөөлөгчид буюу 2020 он хүртэл Орхон аймгийн ард түмний итгэл найдвар, нүүр царай болсон эрхмүүд маань уул үзэлгүй хормой шууж, ус үзэлгүй гутал тайлж байна уу гэлтэй хөрөнгө мөнгөөр туйлах нь гэж хардсан. Гэтэл энэхүү 115 сая төгрөг рүү өнгийгөөд харвал арай ч дээ гэж дуу алдсан. Аймгийн ИТХ-ын дарга асан Б.Мягмарсүрэн албан тушаалаа хүлээлгэн өгөхөөсөө өмнө хууль бус төдийгүй татвар төлөгчдийн нуруун дээр ачаа нэмсэн шийдвэр гаргасан байх юм. Шинэ ИТХ-ын зарим нэг төлөөлөгчийн албан бус тайлбараар эрх мэдлээ хэтрүүлэн аймгийн ИТХ-ын ажлын албаны зарим эд хөрөнгийг хувьчлах шийдвэр гаргасан аж. Ингэснээр 2012-2016 онд ажилласан аймгийн ИТХ-ын 31 төлөөлөгч нарт албан хэрэгцээний нөүтбүүкийг нь хувьд нь өгөхөөр болжээ. Үүний уршгаар шинээр байгуулагдсан аймгийн ИТХ-ын 33 төлөөлөгчдөд шинэ нөүтбүүк авахад хүрсэн байна. 2013 оны хавар аймгийн ИТХ-ын 31 төлөөлөгчид тус бүрт нөүтбүүк авч өгөхийн тулд иргэдийнхээ халаас руу гараа дүрэхээс өөр аргагүйд хүрч, сая төгрөгийн үнэ бүхий нийтдээ 35 сая төгрөгийн өртөгтэй нөүтбүүкээр хангасан. Одоо өнөөдөр дахиад л багагүй хэмжээний мөнгөөр 33 төлөөлөгч нарт нөүтбүүк авч өгөхөөр болж байна. Ядаж байхад манай улсад ам.доллар, юанын ханш өдөр өдрөөс өсч байгааг хэлэх үү, тэдний нөүтбүүк ч нэлээн үнэтэй орж ирэх нь. Нэг сураг дуулдсан нь ОРА 00 02 улсын дугаартай машиныг акталж шинээр жижиг тэрэг авч унахаар П.Пүрэвлхагва дарга хөрөнгийг нь дээрх 115 сая төгрөгт багтаасан байх юм. Аймгийн ИТХ-ын дарга асан Б.Мягмарсүрэн тухайн үеийн тэргүүлэгчдийн хамт тогтоол гаргаж ИТХ-ын даргын жолоочоор аймгийн ЗДТГ-т хоёр жил шахам хүрэхгүй хугацаанд ажилласан гэх багын найздаа улсын өмч хөрөнгө болох нэг өрөө байрыг  үнэ төлбөргүй бэлэглэжээ. Харин шинэ ИТХ-ын зарим нэг төлөөлөгч түүний бусдад байр бэлэглэсэн энэ шийдвэрийг цуцлуулах тухай саналыг тун удахгүй асуудал болгон тавих гэж байгаа сураг гарч байна. Аймгийн ИТХ-ын төлөөлөгч болж чухам л иргэдийнхээ төлөө халуун цусаа ч зориулахад бэлэн нөхөд үнэн хэрэгтээ ганц нөөтбүүкний өмнө өвдөг сөгдөн иргэдийнхээ төлөө гэсэн “тангарагаа” худалддаг юм байна. ИТХ-ын дарга Б.Мягмарсүрэн энэ оны тавдугаар сард Хүндэтгэлийн хаалттай хуралдаан зарлаж 31 төлөөлөгч бүртээ нэг бүр нь 500 мянган төгрөгийн үнэтэй зэс домбо, тус бүр нь 86 мянган төгрөгийн үнэ бүхий зэс аяганы бэлэг дурсгалын зүйлс гардуулсан байдаг. Энэ нь Орхон аймгийн орон нутгийн удирдлагын түүхэнд гараагүй “гэнэтийн бэлэг” байсныг манай сайт уншигчиддаа өмнө нь хүргэж байсан. Иргэд нь бараг л амьд явахын тулд ганц өдөрт тал талхыг таван хүн хувааж идэн шар нар бор хоногийг өнгөрөөж байсан тэр үед манай аймгийн ИТХ-ын төлөөлөгчид сар бүр шагнал гэж авдаг 200 мянган төгрөг дээрээ нэмээд 586 мянган төгрөгийн өртөг бүхий зэс домбо, зэс аяганы өмнө бүгд өвдөг сөхөрч байсан. Өмнөх ИТХ-ын 31 төлөөлөгчөөс “Би энэхүү зэс домбо, зэс аягыг авахгүй, авахаасаа ичиж байна” гэж хэлээд гараад явчих эр зоригтон үнэхээр гараагүй. Бүгд л баярлаад, алгаа тосоод Б.Мийгаа даргыгаа буянтай, нүнжигтэйгээр нь дурсаад л алхаж явсан даа. Шинэ ИТХ-ын төлөөлөгчид 2020 оны хавар нөөтбүүкээ “хувьчилж” аваад хачир болгож алтан аяга авна гэвэл эрдэнэтчүүд гайхаад байх хэрэггүй л болов уу.