Орон нутгийн сонгуулиар байгуулагдсан аймгийн ИТХ-аас Орхон аймгийг 2016-2020 онд удирдах баг тодорч ажилдаа ороод багагүй хугацаа өнгөрөөд байгаа. Саяхан хаалтаа хийсэн УИХ-аас Засгийн газрын бүтэц бүрэлдэхүүнийг баталсан. Үүний үр дүнд Засгийн  газраас аймаг, орон нутгийн ЗДТГ-ын бүтэц бүрэлдэхүүнийг тогтоосон. Аймгийн ИТХ-ын 33 суудлын 30-ыг нь өөрийн болгож чадсан МАН-ынхан хурлын даргаараа П.Пүрэвлхагва, Засаг даргаараа Д.Батлут нарыг томилсон. Ерөнхий сайд Г.Эрдэнэбат Орхон аймгийн Засаг даргаар Д.Батлутыг баталснаар орон нутгийн эрх мэдэл МАН-ынхны гарт орсон. Аймгийн Засаг дарга Д.Батлут ЗДТГ-ын даргын үүргийг түр орлон гүйцэтгэгчээр Д.Соёлчхүүг томилоод байгаа. Д.Соёлчхүүгийн хувьд өнгөрөгч аймгийн ИТХ-ын сонгуульд Зэст багт МАН-аас нэр дэвшин өрсөлдсөн ч Баян-Өндөр сумын Засаг дарга И.Баасанжавт “өвдөг шороодсон”. Аймгийн ЗДТГ-ын даргын томилгоон дээр МАН-ынхан хоорондоо санал зөрөөтэй байгаа. Хэдийгээр Д.Соёлчхүү Архангайнх биш Дорнодын гаралтай ч нам доторх бүлэглэлийн хувьд Д.Батлутын талын хүн. Тиймээс Д.Дэлгэрбаяр тэргүүтэй нам доторх бүлэг тамгын газрын даргад тийм ч талтай биш хандаж, нүдээ олоогүй томилгоо гэж байгаа аж. Ямар ч байсан Авлигатай тэмцэх газраас Д.Соёлчхүүг аймгийн ЗДТГ-ын даргаар ажиллахад ашиг сонирхлын хувьд харшлах зүйлгүй гэснээр тэрбээр тамга тэмдгээ гардан авч ажилдаа ороод байгаа. МАН-ын дотоод зөрчил, бүлэглэлийн эрх ашгийн сонирхол цаашдаа улам гүнзгийрэх үү аль эсвэл сонгуулийн үеийнх шигээ зангидсан гар шиг байх уу гэдэг энэ удаад Д.Соёлчхүүгээс ихээхэн шалтгаана. Аймгийн ИТХ  өмнө нь төлөөлөгчдөө давхар дээл өмсгөж албан тушаалаар шагнаж байсан түүхийг энэ удаад МАН-ынхан дагахаар, давтахаар төлөвлөж байгаа бололтой. Тун удахгүй хийгдэх зарим нэг томоохон томилгоон дээр аймгийн ИТХ-ын төлөөлөгч, тэргүүлэгч цол гуншинтай нөхдүүд албан тушаалын томилгооны эхэнд нэр дуулдаж байна. Тухайлбал, аймгийн ИТХ-ын төлөөлөгч, тэргүүлэгч Д.Мөнхбат “Орхон АЗЗА” орон нутгийн өмчит үйлдвэрийн газрын дарга болох гэнэ. Мөн аймгийн ИТХ-ын төлөөлөгч, аймгийн НАМЗХ-ны тэргүүн Г.Дашравдан Хот тохижуулах газрын дарга болох шийдэлд хүрчээ. Аймгийн ИТХ-ын төлөөлөгч, тэргүүлэгч, аймгийн ИТХ дахь олонхийн бүлгийн дарга Д.Бүүвэйбаатар “Эрдэнэт Ус” орон нутгийн өмчит үйлдвэрийн газрын дарга болж буй аж. Аймгийн ИТХ-ын төлөөлгч, тэргүүлэгч Г.Эрхбаатар “Эрдэнэт дулааны цахилгаан станц” төрийн өмчит компанийн дарга болохоор намынхаа төвшинд яригдаж байгаа гэнэ. Аймгийн Засаг дарга Д.Батлутын зүгээс Засгийн газрын Хэрэг эрхлэх газраас өгсөн зөвлөмж чиглэлийн дагуу бүтцийн өөрчлөлт хийх болов уу гэж харагдаж байгаа. Дээр нь Засгийн газар улсын төсөвт тодотгол хийх гэж буй. Үүнтэй уялдуулан аймгийн хувьд энэ оны төсөвтөө тодотгол хийнэ. Өнөөдрийн байдлаар аймгийн төсөв 2 орчим тэрбум төгрөгөөр хэтэрсэн нь цаашдаа хүндрэл үзүүлнэ гэж санхүүгийнхэн дүгнэж байна. АН-ын сонгуулийн ялалтын буянаар бялуу хүртэж байсан нөхдүүд эхнээсээ  өргөдлөө өгч байгаа бололтой. Нийгмийн хөгжлийн бодлогын хэлтсийн дарга Б.Нацагдорж ажлаас чөлөөлөгдөх хүсэлтээ гарган ноосоо тушаажээ. Түүний араас өргөдлөө бариад гудамжинд лааз өшиглөхөөр зэхэж байгаа эрхмүүдийн цуваа цаашдаа улам эрчимтэй үргэлжлэх болов уу. Сонгууль гэдэг ялалт, ялагдлын дүрмэн дээр явагддаг намыуудын улс төрийн тоглоом учраас “би жинхэнэ төрийн албан хаагч” гэж гоншгонох төрийн албан хаагч АН-ын нөхөд дотор байхгүй. Бүгд ялалтын бялуунаас зүсэм хүртсэн эрхмүүд. Тэд энэ удаад тахимаа өгч өргөдлөө гаргаж байгаа нь улс төрийн соёл гэхээсээ илүүтэй эрх баригчдын хувьд ард түмэнд амласан намын мөрийн хөтөлбөрөө биелүүлэхэд багийн тоглолт хэрэгтэй учраас их бага ч гэсэн тодорхой хэмжээгээр Б.Нацагдорж нарт шахалт үзүүлсэн болов уу. АН-ын хурган дарга нар өргөдлөө өгч эхэлсэн сургаар МАН-ын гэсэн тодотголтой эрхмүүд Засаг даргын өрөөний үүдэнд бөөгнөрсөн дүр зураг ойрд харагдаж байна. Нам гэсэн нэртэй болохоос ядруухан явахад нь тоож хардаггүй байсан ганц нэг эрхмүүд “Манай нам, миний нам ялсан. Би сонгуульд тэгэж ажиллаад” гэж ирээд өөрийгөө өндөрт өргөж дарга нарын өрөөний үүд хавиар эргэлдэж байна. МАХН, энэ намын дарга Н.Энхбаярын нэр сүрээр ажил, албан тушаал хашиж байсан зарим нэг эрхмүүд хэдийнэ МАН-ын гишүүн болчихсон, “Би бодлогогүй хүмүүсийг дагаж явснаа ухаарч байна. Одоо л намынхаа төлөө морь нохой мэт зүтгэе. Дарга болгоод өгөөч” гэж яваа сураг байна, цаана чинь. Зарим нэг томилгооны дүр зураг эхнээсээ гарсан ч дарга болох гэж байгаа нөхдүүд нь местнийхээ шаардлагад нийцэхгүй АТГ бүү хэл Төрийн албаны зөвлөлийн шаардлага хангахгүй бүдрэх маягтай. Намын нэрээр албан тушаал дээр очих бололтой. Хүүхэд, гэр бүлийн хөгжлийн хэлтсийн даргаар МАН-ын хэвлэлийн ажилтан А.Наранболд, Нийгмийн хөгжлийн хэлтэс, Халамж Үйлчилгээний хэлтсийн даргад НАЭХ-ны аймгийн тэргүүн А.Бумансор, Гэр бүлийн ордны даргаар Р.Ханджав, Боловсрол, соёл, урлагийн газрын даргаар Ц.Ариунаа, Н.Өлзийжаргал нарын аль нэг нь, Эрүүл мэндийн газрын даргаар Г.Ганхуяг, Соёл, спорт, аялал жуулчлалын газрын даргаар Д.Зулбаатар нар яригдаж байгаа аж. Аймгийн Засаг даргын зүгээс Ц.Ариунаа, Н.Өлзийжаргал, Г.Ганхуяг, Д.Зулбаатар нарын хувьд тийм ч нааштай хариу өгөөгүй сураг дуулдана. Г.Ганхуяг, Д.Зулбаатар нар нам ялсан цагт албан тушаалын томилгоо болоход гүйж явдаг. Намын өмнө байгуулсан гай ч үгүй, гавьяа ч байхгүй. Харин ч даргаар ажиллаж байхдаа төрийн мөнгийг идэж уусан нь аудитаар тогтоогдож байсан намын нэр хөөдөж мэдэх найдваргүй нөхөд хэмээн МАН-ын зарим хүн ярьж байна. Энэ бүхнээс харвал өнөөдөр, маргааш ирэх өдрүүдэд хийгдэх томилгоонууд араасаа анхаарлын тэмдэг, хардлага сэрдлэг дагуулж мэдэхээр байна. 2016 оны сонгуулиар ард түмэн МАН-ын Мэргэжлийн Засгийн газар байгуулж ажиллана гэдэг мөрийн хөтөлбөрт нь итгэн саналаа өгсөн. Орон нутагт төрийн ажил мэргэжлийн боловсон хүчингүйгээр явахгүй. Энэхүү томилгоонууд маэргэжлийн гэсэн шаардлагад хэр нийцэж, ард түмэн, сонгогчдын таашаалд хэр нийцэхийг харах л үлдлээ.